突破機構
突破機構（英文：Breakthrough，簡稱：突破），喺1973年成立，係香港一間非牟利青少年文化、教育、服務機構，本住基督關懷全人發展嘅精神，以綜合同整全嘅模式，提供前瞻、創新嘅服務，幫助青少年發掘潛質。
使命 編輯
「突破」係以基督信仰為基礎嘅青少年機構，藉媒體同人際接觸，啟發香港青年探索生命，關心社會，活出積極人生，認識並跟隨耶穌基督。
歷史 編輯
1970年代初，一班香港同海外回歸嘅大專畢業生，睇見自己嘅城市陷於物慾橫流、罪案不斷增加嘅景況，於是向上帝祈求，為呢個城市嘅新一代尋覓出路。當時，蘇恩佩女士喺香港養病，並為呢個城市同生活喺其中嘅年輕人流淚，佢開始求問神：我可以為呢個城市做啲乜？突破運動喺1973年展開，並喺1974年1月推出《突破雜誌》，以抗衡文化、逆流而上為使命。1975年成立輔導中心，成為當時為青少年提供專業輔導嘅先驅。同年，「突破」開始發展影音工作，喺商業二台開始《空中突破》廣播節目，1年後開始《突破時刻》，並喺1978年成立影音中心。「突破」一直深信文字對青年人嘅影響力，喺1979年創刊《突破少年》雜誌，並出版咗第一輯《突破叢書》。
踏入1980年代，移民浪潮暴露咗香港嘅無根文化。「突破」重申信念，喺1985年買入「突破中心」，表明植根香港嘅心志，以「植根香港、尋根中國、扎根永恆」嘅方向確認青少年嘅三重文化身分。 同時開展「根」運動，包括製作多元影像《根──獻給這一代香港的中國人》，喺北美巡迴放映。1989年喺《亞洲電視》播出首套電視製作《亞太新人類》，1990年榮獲紐約國際電影電視節優異獎。
1990年代以「塑造廿一世紀領袖」為使命，1993年獲政府撥地喺沙田興建突破青年村，並籌辦多個項目，包括喺1994年開展嘅「成長的天空」先導計劃、1996年舉行嘅第一屆「國際華人青年領袖訓練營」同1997年嘅「全人領袖教育計劃」。1992年喺加拿大成立「突破海外使團」，維繫北美關心「突破」青年工作嘅支持者，並喺1998年喺香港同上海舉行「聽聽少年心底夢」心意卡同「十項聆聽要訣」創作比賽。
踏入廿一世紀，文化隨住時代不斷更新，互聯網同新媒體嘅興起更係不容忽視嘅大趨勢。1999年，《突破》雜誌休刊；2000年，青少年網站「勇想廿一」（Uzone21.com）正式啟用，而青少年雜誌《U+》於2000年創刊。2004年，與8間香港教會結成伙伴，推出「教會青少年導師培育計劃」，採用嶄新訓練模式。2005年，獲優質教育基金贊助，推出為期兩年嘅「創意通識學習」計劃。2009年，通識書誌《Breakazine!》創刊，啟發青少年以唔同角度反思生活，並作為青少年表達呼聲嘅平台，並開展一系列嘅通識教育工作。
隨住手機嘅普及同互聯網嘅應用，令人隨時隨地進入網絡世界，新一代嘅世界觀同價值觀深深噉俾呢個流動世界嘅文化所塑造。2010年開始出版電子書，拓闊新一代嘅閱讀同吸收信息嘅體驗﹔強化 Uzone21.com 「玻璃樽」網誌功能，凝聚網上青年社羣﹔2011年推出「突破影像vBreak」同瀏覽播放專用程式（Apps），以錄像頻道網羅世界各地唔同網上生命文化嘅創意錄像短片，開拓青年視野。同年，首度舉辦全香港第一個「真人圖書館」，畀青年透過面對面嘅接觸，聆聽別人，放下偏見，建立互相尊重嘅對話文化。
事工 編輯
出版及媒體事工 編輯
以書刊出版、禮品製作，培養香港本地創作同閱讀社羣，結合設計同營銷團隊，向青少年同社會大眾傳達信息，回應時代。其中書籍出版分為三大主線：心理與栽培、人文價值、社會文化；而每季出版嘅《Breakazine突破書誌》就係聚焦當前社會狀況，疏理處境脈絡，探索城市出路。
人際事工 編輯
團隊由多位專業輔導員、社工、歷奇教練組成，藉住面談輔導、社區創路、以及訓練營會接觸青少年，幫助佢哋面對成長中嘅風浪，發揮生命中嘅潛能，拉闊對未來嘅想像，成為關心社會嘅僕人領袖。
文化及創意事工 編輯
與年輕人一齊推動並塑造文化，孕育並激發創意，讓城市展現不一樣嘅活力。事工集合共享工作空間Trial & Error Lab、突破書廊、連同影像同數碼媒體，引發青年作出批判思考，抗衡文化，帶嚟價值轉化。
營地及物業管理 編輯
透過創造空間及建立羣體，為青年提供成長訓練、生命反思、價值重整嘅環境同設施。突破青年村同突破中心每年接待超過2,000個團體，服務超過10萬名青少年同青少年工作者。
事工發展及支援 編輯
負責機構嘅財務、人力資源、與外界嘅同行者溝通等，亦積極連繫各界伙伴，包括同學校、教會、以及企業等，一齊並肩服侍年輕人；同時亦進行有關青少年嘅研究，讓青年人嘅聲音被聽見，並為整體事工發展提供參考基礎。
突破青年村 編輯
突破青年村喺1996年啟用，以「一個讓青少年織夢的村莊」為服務目標，提供訓練環境、羣體生活、訊息交流同接待體驗，致力開拓塑造青少年領袖嘅空間。
