窗格

窗格，窗一種，木窗中間，有木條砌成有格花紋，成窗通窿透光透風。另外又寫窗隔，阻隔之意。又或寫做窗槅。有時為咗隔寒，而糊紙糊紗。有時窗格內再加堂卷簾。窗格靚起上來，稱得上木雕藝術。

圖案窗格

木雕窗格

日本障子亦可謂窗格一類

後期有啲就唔用紙，而用玻璃。隔寒之餘，透光更好。有啲用彩色玻璃，更加多色彩。

文

文學上有唔少窗格。大宋沈括夢溪筆談有寫，「蘇易簡為學士、已寢遽起、無燭具衣冠、宮嬪自窗格引燭入照之。」可見燭光由外面照得入。大宋楊誠齋有詩荔枝堂夕眺，「迎寒窗隔重糊遍、只放書邊數眼明。」可知窗格會貼紗貼紙，阻擋風寒。

大明大清時，種種章回小說，有唔少講到窗格。西遊記，「堂後有一座大樓、樓上窗格半開、隱隱見一頂黃綾帳幔。」水滸傳又有寫，「童子點上燈來、閉了窗格、掇張桌子、鋪下五六碟菜蔬。」可知開得閂得，窗咁用。紅樓夢，寫「咱們如今都系霞影紗糊的窗槅。」又寫「窗格門戶一齊摘下、全掛彩穗、各種宮燈。」窗格都拆得落來。同樣亦見喺儒林外史，「張俊民領著小廝、自己動手把六扇窗格盡行下了、把桌子抬到簷內。」