窩伊謝

窩伊謝（波蘭文：Wojciech，1942年—1963年），係一隻響第二次世界大戰期間屬於波蘭流亡政府第2兵團第22砲兵運補連正式編制嘅一隻敘利亞棕熊。喺卡西諾戰役，窩伊謝幫尐士兵搬彈藥。

窩伊謝嘅名美式英文嘅串法係「Wojtek」 ，英式英文則串做「Voytek」。佢嘅波蘭文名「Wojciech」係一個古老嘅斯拉夫人名，意思係「享受戰爭嘅人」或者「面帶微笑嘅戰士」。

早期

響1942年，一位住喺伊朗王國嘅男仔捉咗當時啱啱學識行路嘅窩伊謝，又將佢賣畀駐紮喺附近嘅波蘭部隊。由於佢毛茸茸嘅外表加上蹣跚嘅形態，當地官兵同附近民眾好中意窩伊謝。當時，因為窩伊謝未滿一歲，尐士兵俾奶佢飲。後來，士兵開始畀生果、果醬、蜂蜜同糖漿佢食，有時候重會畀佢飲啤酒同埋食煙。

之後，窩伊謝跟住部隊由伊朗移去伊拉克，又遷移過去敘利亞、巴勒斯坦、埃及同意大利南部。響由埃及移防意大利之前，由於友軍英國第8軍團唔肯畀隻熊上船，指揮官將佢列為部隊正式編制成員，又將佢個名改做窩伊謝，享有軍階同軍餉。

打仗嗰陣

隨住卡西諾戰役爆發，移防到意大利南部嘅波蘭部隊投入戰場，由五月中開始頂替已經傷亡慘重嘅英國第78步兵師。窩伊謝因為好大力而被訓練搬運各種重要補給品，尤其係砲彈之類嘅重嘢。窩伊謝從來未試過跌嘢，亦都無俾槍砲聲嚇親，因此指揮總部特別嘉許，重將第22砲運連嘅徽章改做一隻抱着砲彈嘅熊。

1945年，第二次世界大戰接近尾聲，第22運輸連俾人調咗去蘇格蘭駐紮，當地居民同媒體都好中意窩伊謝。波蘭－蘇格蘭文化協會（Scottish Polish Cultural Association）頒發窩伊謝「榮譽會員」嘅資格，以示對佢嘅喜愛同崇敬。大戰結束之後，隨住波蘭部隊嘅解編，好多官兵解甲歸國，無人照顧嘅窩伊謝俾人送咗去愛丁堡動物園，響當地度過餘生。

戰後生活

響動物園，窩伊謝係遊客嘅焦點，亦都會有以前嘅同袍探佢，而佢重會同探佢嘅士兵攞煙仔食。

窩伊謝最後響1963年12月過咗身，享年22歲；就一隻熊嚟講，已經算係長命。窩伊謝過身嗰時重500磅，長六英尺。

相關嘅影視作品

• 響2011年12月，一套叫做《窩伊謝 - 去打仗嘅熊》（英文：Wojtek - The Bear That Went To War）嘅紀錄片喺蘇格蘭上映。