競技場射擊遊戲

競技場射擊遊戲（英文：arena shooter）係射擊遊戲一種，第一身定第三身都得，特點係俾玩家喺一個密封嘅環境（競技場）入面對局。競技場射擊遊戲嘅遊戲世界通常都唔會好大，一場對局頂櫳得 10 個玩家左右，好多時仲係少過 10 個，而且會有某啲遊戲機制，俾玩家用行同跑以外嘅方法嚟移動（例如係火箭跳或者瞬間轉移呀噉），整體嚟講令成隻遊戲嘅節奏快，要求玩家反應要夠快之餘又要曉運用戰術。喺遊戲模式上，競技場射擊遊戲多數都係以死亡競賽為主，而 king of the hill 同奪旗等都係競技場射擊遊戲常見嘅遊戲模式。競技場射擊遊戲嘅例子有《魔域幻境系列》（Unreal）。

例如《Splitgate》呢隻喺 2021 年出嘅競技場射擊遊戲噉。呢隻遊戲係純 PvP 嘅，俾玩家喺網上對局，每場對局會有 8 位玩家，對局有死亡競賽同 king of the hill 等嘅多種模式，對局進行嘅競技場唔大，而且玩家角色手持嘅傳送門槍，用呢支槍射落競技場嘅某啲表面嗰陣，就會喺兩塊表面之間製造出傳送門，並且可以喺傳送門之間瞬間轉移（特別嘅移動方法）；除此之外，玩家嘅武器仲會慢慢噉演進－通常喺一場對局開始嗰時，玩家手上淨係得最渣嗰種槍，不過佢哋可以一路戰鬥一路喺競技場嘅各個角落嗰度執到啲更加勁嘅槍，令佢哋手上嘅武器慢慢噉變得愈嚟愈勁。