第11屆法國總統選舉

第11屆法國總統選舉響2017年4月23號同5月7號舉行。

第11屆法國總統選舉
法國選舉政治專題
‹ 2012 •  • 2022 ›
2017年4月23號
選舉類型				總統
選舉制度				單選區絕對多數制
選舉統計
第一輪選民人數						47,582,183
第二輪選民人數						47,448,893
第一輪總投票數						37,003,728
‎第一輪總投票百分比 有效選票　　　　　　　　36,054,394 無效選票　　　　　　　　949,334
							77.77% ▼ 2.58%
第二輪總投票數						35,407,615
‎第二輪總投票百分比 有效選票　　　　　　　　31,340,814 無效選票　　　　　　　　4,066,801
							74.62% ▼ 4.05%
			馬克龍－前進！
			第一輪投票數				8,656,346
			第二輪投票數				20,703,694 ▲139.2%
									24.01%
									66.06%
			瑪麗勒龐－國民陣線
			第一輪投票數				7,678,491
			第二輪投票數				10,637,120 ▲38.5%
									21.30%
									33.94%
			菲永－共和黨
			投票數				7,212,995
									20.01%
			梅朗雄－左翼黨
			投票數				7,059,951
									19.58%
			哈蒙－社會黨
			投票數				2,291,288
									6.36%
			投票數				1,695,000
									4.70%
			抵制！
			投票數				435,301
									1.21%
			新反資本主義黨
			投票數				394,505
									1.09%
			人民共和聯盟
			投票數				332,547
									0.92%
			工人鬥爭
			投票數				232,384
									0.64%
			團結和進步黨
			投票數				65,586
									0.18%
選票分佈圖
20,703,694   前進！						10,637,120   國民陣線
法國總統
選前 奧朗德 社會黨						選後 馬克龍 前進！

候選人

社會黨

内文：第11屆法國總統社會黨提名初選

法國總統奧朗德喺2016年9月26號去到北部港口城市加來，主持新擴建港口落成儀式。佢喺致辭話，會喺年底前要拆嗮當地嘅「叢林」臨時難民營，又會增派警力杜絕難民再喺度聚居，最終會將佢哋安置喺國內嘅收容中心。當局初步估計，難民營容納咗成七千幾人，唔少人設法喺呢度闖關去對面海嘅英國，尋求庇護或者同屋企人團聚。奧朗德就要求英國方面分擔難民問題嘅責任。今次係奧朗德2012年就任以嚟第一次訪問加來。分析話，佢此行係想展示處理難民危機嘅決心，為出年總統大選爭取支持。

共和黨

内文：第11屆法國總統共和黨提名初選

初選結果由菲永代表共和黨出選總統。

有法國傳媒揭發菲永做咗議員八年入面，請老婆做議員助理，冇做過嘢就白𢭃五十萬歐元人工，2月，法國檢察部門決定對共和黨總統候選人菲永展開司法調查。檢方已經委託司法官調查菲永涉嫌請老婆做掛名助理，領取超過九十萬歐元人工嘅案件。司法官會有更多手段調查包括截聽電話之類，目前未知調查響4月同5月兩輪大選前有冇結果。而菲永嘅法律團隊發聲明話，有信心結果會證明菲永同佢老婆係無辜。

菲永選情再受挫折，競選發言人索萊爾同競選辦公室主任斯泰法尼尼，3月3號先後宣布辭職，已經得到菲永批准。同共和黨結盟嘅中間派獨立民主聯盟就宣布撤回對佢嘅支持。

有報道話，共和黨入面蘊釀緊「倒菲潮」，傾向由前總理朱佩取代佢出選。眾叛親離嘅菲永冇宣布退選，佢透過社交網站上載片段，呼籲支持者堅持，又叫佢哋3月5號出席競選活動造勢。到咗3月5號，成千上萬嘅民眾響應菲永號召，到艾菲爾鐵塔一帶集會。佢哋不停揮動法國國旗，出現一片藍白紅三色旗海，支持菲永繼續參選總統。亦有佢嘅支持者響街上派傳單，指菲永捲入涉嫌請老婆做掛名助理風波唔抵，認為外界應該停止攻擊。而菲永發言時話，呼籲支持者唔好放棄，又話一早唔應該要求老婆做自己助理，搞到今時今日嘅濫用公帑風波，之後再同國民解釋事件嗰時亦有猶疑，向支持者道歉，但係佢堅稱自己清白，針對佢嘅指控唔公平，又批評響事件曝光之後割席跳船嘅盟友，呼籲支持者不要放棄。

不過有消息話，共和黨部分高層已經有後備方案應對。據報，前總統薩爾科齊已經私底下同前總理朱佩講電話，計劃推舉朱佩，代替菲永競逐愛麗舍宮寶座。第日3月6號，共和黨嘅前總理朱佩話雖然有人希望佢參選，但臨時換人已經太遲，佢亦唔希望自己同屋企人被傳媒打擾，決定唔會接替菲永代表共和黨，出戰四月同五月舉行嘅總統選舉。朱佩同時批評菲永浪費咗成為總統嘅機會，話佢將濫用公帑嘅醜聞形容係陰謀同政治謀殺，先會令自己陷入困境。之後3月7號共和黨響巴黎總部同黨入面高層開緊急會議。菲永要求共和黨尊重黨內初選結果，而且強調佢係唯一合法候選人，唔存在後備方案。會後共和黨政治局宣布一致支持菲永，會幫菲永競選總統注入新動力，而且準備好加入呢場選戰，同菲永一齊重新展開選舉工程。而前總統薩爾科齊話，本來希望安排朱佩同菲永會面，挽救共和黨選情。

3月8號，菲永再捲入醜聞，法國《鴨鳴報》報道，菲永響2013年接受一名商人一筆五萬歐元嘅免息貸款，但係冇按規定申報。菲永向調查人員解釋，當時係唔記得申報，佢嘅律師就話菲永一早還清貸款。而向菲永提供免息貸款嘅商人，響2011年得到當時擔任總理嘅菲永推薦獲頒法國最高榮譽勳章。

3月15號，菲永涉嫌虛設職位畀老婆同仔女掛名做助理，白攞人工，原定15號應訊，但有報道話為咗避開傳媒，當局決定提早針對菲永嘅預審，當局以三項罪名起訴菲永，包括挪用公款、侵佔公共財產同冇履行申報義務，預審過程可能要幾個月。之前菲永曾經講過如果因為呢件案受到立案審查就會退出大選，但響預審法官決定作出傳召之後，菲永改口宣布會堅持參選。案件雖然進入司法程序，但係菲永可以繼續競選活動，不過相信調查會進一步打擊佢已經低迷嘅支持度。而響29號，佢老婆佩內洛普被預審法官正式調查之後，司法部消息話佢初步會被控挪用公款同以欺詐手法獲取金錢報酬。

國民陣線

瑪麗勒龐嘅保鑣同助手被指響佢擔任歐洲議會議員嗰陣，領取歐洲議會薪酬，實際上係幫國民陣線做嘢被司法機會調查，瑪麗勒龐因為同時係歐洲議會議員所以有刑事豁免權，講明響大選結束之前，拒絕接受司法調查。但係佢響網上發放伊斯蘭國處決人質嘅相就搞到歐洲議會響3月2號表決通過，就瑪麗勒龐被法國檢察當局調查有冇散播暴力影像，剝奪佢作為歐洲議會議員享有嘅刑事豁免權，意味佢隨時可能就2015年底響Twitter發放三張關於極端組織伊斯蘭國處決人質嘅相，面臨被起訴甚至審訊，一旦入罪，最高刑罰係判監三年同罰款七萬五千歐元。不過佢認為自己冇做錯，話譴責暴行係議員職責。

極右國民陣線響里昂召開嘅黨代表大會到，領袖瑪麗勒龐有提出超過幾百項承諾，包括對外國人嘅工作合約徵稅、增加社會福利之類。之後發表閉幕演講，重申佢提出嘅多項競選承諾，強調「法國優先」政策先係法國未來嘅出路，呼籲選民投票，為國家帶來真正嘅變化。佢形容歐盟失敗，冇法維持法國繁榮同安全，又話法國正受全球化同伊斯蘭原教旨主義威脅，對法國本地文化構成衝擊。聲言如果自己贏出，將會發起退出歐盟公投；又打算離開北約，建立屬於本土嘅防衛力量，同埋會效法美國總統特朗普，限制穆斯林入境法國，同埋將懷疑伊斯蘭激進分子驅逐出境。

馬克龍

法國前經濟部長馬克龍宣布參選出年總統選舉，三十八歲嘅馬克龍屬中間派，以獨立身分參選，佢認為法國透過改革，同其他國家競爭先能夠成功。

馬克龍曾經做過投資銀行家，2014年至今年八月，響奧朗德內閣做過經濟部長，今年發起名為「前進」嘅政治運動。

分析指馬克龍同共和黨嘅前總理朱佩票源相似，有可能搶走佢嘅選票。

前經濟部長馬克龍就因為共和黨菲永受醜聞拖累，得到大批民眾支持，佢響里昂嘅造勢大會就有幾萬人出席。馬克龍發表演講時批評瑪麗勒龐反歐元、反移民嘅主張，又誓言要團結國家，打破左右界線。

民意調查

民意調查話，朱佩嘅支持度壓倒前總統薩爾科齊，有望贏出共和黨2016年11月20號開始嘅初選。

多項民意調查話，極右國民陣線主席瑪麗勒龐嘅支持度，足以令佢進入第二輪總統選舉投票，但未必能夠贏出選舉。

分析

做過總理嘅菲永本來係呢屆選舉大熱，因為共和黨傳統對手社會黨嘅現任總統奧朗德民望一直響歷史低位，大大拖累社會黨嘅支持度，所以呢屆選舉共和黨原本係志在必得，但係隨住菲永被人踢爆涉嫌利用公帑請老婆做掛名助理，民望幾乎插水。民調顯示亦話佢會響首輪投票到出局，醜聞亦都引發中右翼陣營強烈不滿，要求佢退選，佢嘅競選團隊亦出現「跳船潮」，黨入面一直蘊釀搵過另一個人取代菲永出戰。但係共和黨入面似乎冇人肯接呢個燙手山芋，呼聲最高係前總理嘅朱佩就講明拒絕代替菲永競逐總統，而菲永嘅主要對手，中間派候選人馬克龍同極右國民陣線瑪麗勒龐都話共和黨嘅事同自己冇關，瑪麗勒龐認為中右翼陣營陷入完全分裂狀態，響今次危機上面冇出路。隨著菲永自毀長城，呢次選舉好大機會首次冇社會黨者共和黨呢兩個傳統大黨候選人進入第二輪投票。