策略計劃（粵拼：caak3 loek6 gai3 waak6）係指一個組織或者個人定位佢哋嘅策略同埋按策略分配資源。策士要制定長遠同短期嘅目標，例如喺一隻戰略遊戲當中，長遠目標可能係要擴張自己嘅領土，而短期目標就可能係要搜集資源，為領土擴張做準備。喺成個過程當中，策士有需要諗吓唔同嘅短期目標「邊個重要啲」，而且佢仲要有彈性，諗吓有邊啲情境係大機會發生嘅，以及係呢啲情境發生嗰陣自己要點應付。
