簡潔定律

揳夫簡潔定律（英文：Zipf's brevity law），又叫簡潔定律（Brevity law），係語言學上嘅一條定律。根據呢條定律^[1]，一隻字喺隻語言入面出現得愈密，隻字就傾向愈短。技術化啲講，即係話是但攞隻語言嚟睇，每一隻字嘅「長度」同「出現頻率」呢兩個變數會成負相關。

呢條定律係由美國語言學家佐治揳夫喺 1945 年提出嘅，當時揳夫佢喺度研究英文入面嘅字，發覺英文裏面出現得最密嗰幾隻字－the, be, to, of, a－都好短，頂嗮櫳得嗰三隻字母咁長；打後佢去研究拉丁文嗰陣，又係觀察到噉嘅情況，於是佢就提出咗簡潔定律，主張人喺講嘢嗰時傾向會想令啲常用字有咁短得咁短，噉做講嘢嗰陣會慳返好多精力，而且寫字嗰陣又會慳返好多時間^[2]。