粉嶺龍躍頭天后宮
粉嶺龍躍頭天后宮座落香港新界粉嶺龍躍頭龍山西北面山麓，喺老圍同祠堂村之間，位於松嶺鄧公祠旁邊，係當地嘅主要廟宇。天后宮喺2002年11月15號被列為法定古蹟。
歷史
編輯天后宮起嘅年份已經無從稽考，據村中父老相傳，間廟嘅建造年代比松嶺鄧公祠重要早，係族人為咗祈求子弟應考科舉順利嘅廟宇。而家嘅規模係民國二年（1913年）修繕後嘅建築。
結構
編輯天后宮係傳統兩進式建築，裏面以天井分隔，廟宇正面飾有精緻嘅灰塑及壁畫，寓意吉祥，門額為直書「天后宮」，門旁嘅對聯係「后德齊天憑護佑 母儀稱聖藉維持」。廟裏面正殿則供奉天后，共有一大一細兩座神像，大嘅係坐像供日常參拜用，而細嘅係外像，供慶典巡遊用，兩旁分立侍神千里眼同順風耳。後進東面偏殿供奉土地，裏面置有兩個銅鐘，其中一個銅鐘鑄喺康熙三十四年（1695年），乃鄧氏族人為啲仔投契天后嘅許願酬神之物；另一個古鐘喺康熙三十九年（1700年）鑄造，係麻笏圍族人子弟出門去省城應試，祈求路上平安而酬神之物。
參考
編輯- 《新界宗族文化之旅》，嚴瑞源編著，萬里書店，ISBN 962-14-2936-6