系統綜述

系統綜述（英文：systematic review）係指有系統性嘅文獻綜述。做系統綜述嘅人喺郁手做之前會講明自己要用啲咩方法搵文獻，而呢套方法係有某啲內在邏輯嘅（例如「我會用呢隻搜尋器，摷呢啲呢啲關鍵字」）。

步驟

睇埋：元分析

一般嚟講，要做系統綜述，需要考慮以下呢啲嘢：

• 要用咩做標準決定包邊啲文（inclusion and exclusion criteria）？呢場綜述會唔會淨係睇某啲時期之間出嘅文？會唔會淨係包用某隻實驗方法做嘅研究？會唔會淨係包做喺某類對象身上嘅研究（例如今次綜述淨係睇研究昆蟲嘅動物行為研究）？會唔會排除某啲特定類嘅文（例如已知某隻統計分析方法有問題，所以用嗰隻方法嘅文冚唪唥排除）？
• 用咗咩方法摷文獻？呢場綜述用咗邊啲搜尋器（睇吓 Google Scholar）摷文獻睇？用咗咩關鍵字嚟摷文？
• 摷嗮啲文返嚟，按標準排除咗唔想要嗰啲文之後，有冇檢驗吓啲文嘅質素？有關「點樣判定一份研究嘅質素」，可以睇吓樣本大細同雙盲等嘅概念。
• 有冇做元分析（meta analysis）或者敏感度分析（sensitivity analysis）？

研究者最後就會畫個表出嚟，總括嗮經過咁多篩選程序淨低嘅文，講吓呢啲文（例如）用咗咩量度方法同埋搵到咩結果... 等等。

睇埋

• 企咗喺巨人嘅膊頭上面
• 資訊爆炸