盧渥

盧渥（820年—905年），字子章，唐朝詩人，幽州范陽（今河北涿州）人。

盧渥赴舉嗰陣喺御溝側面搵到塊紅葉，上面題有一首詩：「水流何太急，深宮盡日閒，殷勤謝紅葉，好去到人間。」呢個據講就係「紅葉題詩」嘅典故。

紅葉題詩編輯

《紅葉題詩》係唐朝文學入面一個出名嘅故仔。個故仔其中一個版本係噉嘅：

「

唐僖宗下有個叫做於佑嘅書生。佢有日傍晚喺皇城街頭散步，當時正值深秋，夕陽殘照，落葉紛飛，而於佑因為要讀書而離鄉背井，覺得有啲哀愁。佢去到一條河邊，諗住洗吓手，發現由皇宮嘅方向有柞紅葉隨水飄咗過嚟，當中有塊紅葉上有墨跡引起佢注意。佢當場一嘢將塊紅葉攞上手，見到塊葉上面寫咗首詩：『流水何太急，深宮盡日閒。殷勤謝紅葉，好去到人間。』於佑讀到首詩覺得幾鍾意，跟住帶咗塊紅葉返屋企，得閒仲會攞出嚟吟誦，想像首詩嘅作者係皇帝宮中一個有文采又有姿色嘅美人。打後佢喺朋友建議下，又搵咗塊紅葉，喺上面寫『曾聞葉上題紅怨，葉上題詩寄阿誰？』－意思係『我聽過寫喺葉上嘅情愁，葉上嘅詩係寫俾邊個㗎？』噉解。然後於佑就將塊紅葉由御河上游度放入去皇宮^[1]。
好多年之後，於佑因為考科舉考唔掂，走咗去第度做文書職務，手上嘅錢開始變多，但經已冇心機再考科舉。過咗幾年，於佑覺得自己成卅歲人，又有返咁上下收入，都係時候娶老婆成家立室，咁啱嗰時皇宮又趕咗柞宮女出宮，於是佢就喺朋友安排下，娶咗一個相當有姿色嘅前宮女韓氏做老婆。婚後，韓氏有日喺佢老公嘅書箱入面，發現咗嗰塊有詩喺上面嘅紅葉，就問於佑係點得到嗰塊紅葉嘅；於佑如實話咗成件事俾佢老婆知，然後韓氏話俾佢老公知，首紅葉詩係佢寫嘅，跟手即刻由佢衣箱嗰度又攞咗塊紅葉出嚟－韓氏塊紅葉上寫咗『曾聞葉上題紅怨，葉上題詩寄阿誰？』^[1]

」

及後，於佑同韓氏嘅事廣為流傳。後世有唔少人形容呢個故仔係唐詩當中一個令人嚮往嘅愛情故事，而紅葉題詩嘅題材打後仲有出現喺粵曲等嘅文化產物嗰度^[2]。