細胞質

細胞質係細胞裏頭嘅一種凝膠狀物質，包含有胞質溶膠同埋一啲細胞器。原生質係由水、鹽、有機分子同埋各種催化反應嘅酶所組成。細胞質喺細胞膜入面包圍住細胞核同埋細胞器。

動物細胞結構圖解。①核仁 ②細胞核 ③核糖體
④囊泡 ⑤糙面內質網 ⑥高爾機體 ⑦細胞骨架
⑧光面內質網 ⑨線粒體 ⑩液泡 ⑪細胞質
⑫溶酶體 ⑬中心粒

元件

細胞質係由離子同埋可溶性高分子，例如酶、碳水化合物、唔同嘅鹽、蛋白質，以及大量嘅核糖核酸所組成。

細胞質可以係凝膠狀或者係液體，視乎當時細胞嘅活動而定。喺凝膠狀之下，細胞質會被命名為胞質凝膠，係一種固體質量。而如果係液體，就係胞質溶膠，一種流動嘅液體。一般嚟講，近住細胞外邊部份嘅係凝膠狀，而細胞入邊嘅係液體。

細胞質中入面有細胞器（例如：線粒體、葉綠體、溶酶體、過氧物酶體、核糖體）、液泡、細胞骨架同埋複雜嘅細胞膜結構（例如：內質網）。佢喺植物細胞之中亦都幫助進行消化。

唔同生物嘅差異

所有細胞都係有細胞質，之但係唔同生物，細胞質都可以好唔同。例如喺動物界，細胞質佔咗差唔多半個細胞嘅體積；但喺植物界，因為植物細胞入面有液泡，細胞質只係佔好少空間。

功能

細胞質最主要係負責維持細胞嘅形狀，鞏固細胞，並且提供懸浮俾細胞器。

佢亦都係一個化學物質儲存室，而呢啲化學物質牽涉到重要嘅代謝作用，例如醣酵解同埋蛋白質生物合成。