給十九歲的我
《給十九歲的我》（片名粵文意思：畀十九歲嘅我，英文：To My Nineteen Year Old Self），係香港一套紀錄片電影，由張婉婷、郭偉倫執導，黃慧監製，英華女學校出品，主角係六位英華女學校學生。電影喺2021年12月校內首映，2022年9月30號優先場公開首映，並安排喺2023年2月2號開始喺香港戲院正式公映。因為正式公映後爆出有主角從未同意公映嘅爭議，導演張婉婷宣佈2月6號開始暫停公映。
呢套紀錄片最後先後獲頒第29屆香港電影評論學會大獎最佳電影同最佳導演[1]、2022年度香港電影導演會年度大獎最佳電影[2]，同埋第41屆香港電影金像獎最佳電影。[3]
爭議
編輯- 紀錄片其中一位主角王卓聆（阿聆）指控佢當初參與拍攝嗰陣無人講過會公開放映，以為只係校內放映，當佢知道打算將條片公開放映之後，曾多次表達唔同意公開放映嘅意願，但校方同拍攝團隊都唔理佢嘅意願。另一位主角佘麗薇（阿佘）雖然一樣反對公開放映，但佢覺得提反對都冇作用，所以最後選擇妥協。之後第三位主角江冰瀅（香港小姐）亦出聲，表示簽公映同意書時拍攝團隊話所有人已經簽咗名爭佢一個未簽，所以佢先至跟住簽。
- 香港單車運動員李慧詩表示片入面嘅接受張婉婷訪問片段，係未經佢本人同意放入紀錄片入面，佢亦唔知道訪問片段會放入一套商業電影度。佢公開呼籲「我唔會睇，亦唔鼓勵你睇」。
參考資料
編輯- ↑ 〈香港電影評論學會大獎｜《給十九歲的我》膺最佳電影 張婉婷開心港人支持港產片〉。am730。2023-01-16。喺2023-02-09搵到。
- ↑ 〈《給十九歲的我》獲導演會最佳電影 郭偉倫：清者自清沒強迫拍攝〉。《香港01》。2023-03-16。喺2023-03-16搵到。
- ↑ 〈金像獎2023｜劉青雲、鄭秀文奪最佳男女主角 《給十九歲的我》奪最佳電影〉。am730。香港。2023-04-16。喺2023-04-16搵到。