經濟增長
經濟增長（粵音：ging1 zai3 zang1 zoeng2）簡單講可以理解為一個經濟體嘅「經濟表現」隨住時間而上升：經濟學上有好多指標可以用嚟衡量一個經濟體表現如何，譬如係本地生產總值（GDP）呀噉；做統計嘅人會睇住呢啲指標，按通脹做調整，從而評估經濟表現。要評估經濟增長情況，最常見嘅係檢視實質 GDP 嘅百分比增長率[1][2]。
.JPG)
要評定經濟增長，通常係睇實質 GDP 增長率、人均實質 GDP 增長率、或者人均國民收入增長率：當中增長率係指喺一段時期入面，第一年同最後嗰年之間响指標數值上每年平均升幾多 %。呢個率反映段時期內指標嘅變化平均呈乜嘢趨勢[註 1]；實質係指計數嗰陣啲指標要按通脹做調整，消除通脹對貨品同服務價格嘅扭曲效果；而人均意思係指要將 GDP 嘅總值除以個經濟體嘅人口，得出平均每人分到幾多 GDP。
响廿一世紀初經濟學，經濟增長可以按成因分做兩大類[3]：集約化增長係指增長源於更有效使用投入要素（勞動力、能源或者生產用嘅材料）；相比之下，一個經濟體望落增長咗，亦可能只係因為可用嘅投入要素多咗，例如人口或者領土增加呀噉，呢種增長就係廣泛增長。科技方面嘅創新，好多時都有助人類更有效噉做生產，帶嚟集約化增長。
影響因素
編輯人均產出可以受好多因素影響：每單位勞動投入嘅產出（勞動生產率）、工作時數、實際有做嘢嘅適齡人口百分比（參與率）同埋適齡人口佔總人口幾多（人口結構）... 等嘅因素，冚唪唥都可以左右人均產出。
|
計數嗰陣，經濟學家會分辨長期同短期嘅經濟增長。事實表明，就算冇乜特別事發生，一個經濟體嘅經濟活動都梗會有週期性嘅上上落落，總需求同好多其他變數都會不斷起起跌跌（波動），呢樣嘢就係所謂嘅商業週期[4]。相比之下，經濟增長係講緊一種長期趨勢，呢股趨勢源自結構性嘅原因造成，例如係科技進步噉。
相關政策
編輯調整利率
編輯政府可以降低商業銀行嘅存貸款利率。此舉可以透過好多方式影響經濟增長：政府降低利率，就表示啲人借錢做生意同投資嘅誘因強咗，而呢啲活動多咗，個經濟體就比較容易有增長。
除此之外，降低利率仲可以減低通縮嘅風險：如果一個經濟體啲貨品同服務嘅價呈跌勢（通縮），啲人就有誘因唔買嘢，因為佢哋預佢哋想要嘅嘢跟住落嚟價值會跌，消費就會跟住呈跌勢。如是者就會形成惡性循環。而降低利率就表示啲人更加有誘因（例如）借錢買樓，往往仲會形成輕微嘅通脹，啲人嘅誘因變成唔好揸住啲錢，而係攞啲錢去使咗佢（或者做投資）消費就會增加。不過降低利率又有可能增加通脹或者流動資金過剩嘅風險[5]。
|
財政政策
編輯政府亦可以增加佢哋嘅財政支出。呢種措施會創造就業機會、需求，仲有可能吸引埋投資[6]。
政府支出本身就可以用嚟投資工程項目，呢啲項目創造就業同對其他行業嘅需求，例如政府出錢起橋，就要請工人同埋工程師等嘅人員。呢啲從業員有錢賺就會想攞啲錢去使，產生新嘅需求。噉樣推演落去，政府理論上可以創造比投資本身大好幾倍咁多嘅經濟增長。
相對於利息政策，政府支出有一啲優勢：加息嘅時候，啲人會將多餘嘅錢用嚟做存款，而唔肯攞去用嚟消費或者投資；相比之下，增加財政支出嘅時候，就可以肯定增加嘅收入大部分會轉變成消費，去滿足從業員嘅基本需求。另外啲人為咗應付經濟危機，都要有足夠嘅存款，具體數目要睇國家具體嘅經濟形勢同社會保障情況。呢個政策嘅缺點係擴大財政赤字，而且因為公共投資嘅目的一定要清晰，佢哋嘅效率經常都畀人質疑。
政府又可以降低個人或者公司嘅稅率。呢個措施同減息一樣，會促進企業投資同個人消費嘅誘因。個人消費增加又會反過嚟創造需求，促進企業發展[7]。不過降低稅率都有風險，就係可能會增加政府嘅財政赤字[註 3]。
匯率政策
編輯政府可以降低本地貨幣嘅匯率（低匯率政策）。噉做會增加佢哋嘅出口，因為本地貨品喺國際市場上嘅價格變得平咗。出口增加就會令生產商增加投資同創造就業機會，從而增加埋消費。
呢種做法缺點係，本地貨品喺國際市場上嘅價格最終係由生產商決定嘅，如果生產商同時加價，個政策就唔能夠產生預期嘅效果，而且相對嚟講，進口貨品會貴咗。長期實施低匯率政策會導致通脹。
社會影響
編輯生活質素
編輯
有關經濟增長同生活質素之間有咩關係，有經濟學家提倡所謂嘅臨界假說[8]。根據呢個諗法，經濟增長會提升啲人嘅生活質素，不過呢股升勢只會去到某個點。一到咗呢個臨界點，持續嘅經濟增長反而可能會令生活質素下降。呢段關係可以用一條好似倒轉嘅 U 噉形嘅曲線嚟表示，曲線頂點就係應該追求嘅增長水平。實證嘅研究顯示，人均 GDP 同啲人嘅幸福感之間確實有正嘅相關，不過人均收入一過咗 15,000 文美金，呢段關係就唔再成立。
經濟增長可以用嚟減輕貧窮：噉係由於就業機會同勞動生產力會同時增加。有英倫嘅智庫對二十四個經歷咗經濟增長嘅國家同地區做研究，發現其中十八個國家貧窮情況都有改善。
生產力提升唔一定會帶住工資一齊升，好似美國就係一個例子。喺美國，自從一九八〇年代開始，生產力同工資之間嘅差距就一直擴大緊。
全球暖化
編輯經濟增長同二氧化碳排放率之間有緊密嘅關係[9]：生產要用各種嘅機械，運貨送貨要用各種嘅交通工具，啲嘢攞去舖頭賣，舖頭營運又要用燈同埋各種嘅工具，呢啲嘢全部都會排放二氧化碳。有報告指出，喺照常營運嘅情況下，全球排放量將足以推動溫室氣體濃度喺二〇二五年超過 550 ppm 咁多二氧化碳，到廿一世紀末就會超過 650-700 ppm，呢個預測喺模型假設有廣泛變化嘅情況下都仲會成立。科學界嘅共識係，要令地球生態系統可以持續運作而唔會產生危險風險，就需要將濃度穩定喺 450-550 ppm 嘅水平[10]。
因此，以增長為導向嘅經濟學家建議政府介入能源生產[11]，支持風能、太陽能、水力發電同核能等比較少排放二氧化碳嘅能源，將化石燃料嘅使用主要限制喺家庭煮食需要... 等等。英國政府喺二〇〇六年發表嘅報告得出結論[10]，犧牲投資 GDP 嘅 1% [註 4]就足以避免氣候變化最嚴重嘅影響，而如果唔噉做，就可能要面臨相當於 GDP 20% 咁多嘅成本[註 5]。
睇埋
編輯
|
註釋
編輯引咗
編輯- ↑ Roser, Max (2021). "What is economic growth? And why is it so important?". Our World in Data.
- ↑ Statistics on the Growth of the Global Gross Domestic Product (GDP) from 2003 to 2013 互聯網檔案館嘅歸檔，歸檔日期2013-05-03., IMF, October 2012. - "Gross domestic product, also called GDP, is the market value of goods and services produced by a country in a certain time period."
- ↑ 英文——集約化增長：intensive growth；廣泛增長：extensive growth
- ↑ （香港繁體） 第7課: 商業周期及經濟指標，香港中文大學
- ↑ 利率如何影響通膨和成長，Skilling（中文書面語）
- ↑ Does Government Spending Stimulate the Economy?
- ↑ Which taxes are best and worst for growth?.
- ↑ Manfred Max-Neef (November 1995). "Economic growth and quality of life: a threshold hypothesis". Ecological Economics. 15 (2): 115-118.
臨界假說：threshold hypothesis - ↑ Garrett, T. J. (2009). "Are there basic physical constraints on future anthropogenic emissions of carbon dioxide?". Climatic Change. 104 (3-4): 437.
- ↑ 10.0 10.1 Stern Review Economics of Climate Change. Part III Stabilization p. 183
- ↑ Jaccard, M. (2005). Sustainable Fossil Fuels. New York: Cambridge University Press.
- ↑ What's the correlation between Calorie Consumption and GDP: How Nutrition Reflects Economic Well-being[失咗效嘅鏈]. Economy.kz
拎
編輯- （香港繁體） 主頁 > 香港經濟情況 > 最新發展，香港特區政府
- （英文） Greenlaw, S. A., Shapiro, D., & MacDonald, D. (2022). Principles of economics 3e（譯：經濟學原理 3e），OpenStax