經驗學習曲線

  想搵用嚟描述一個人嘅表現變化嘅線嘅話，請睇學習曲線。

經驗學習曲線（experience curve）係工業上會用嘅一種數學模型，表達產量同經驗之間嘅關係。喺 1936 年，有美國嘅航空工程專家喺度研究工人組裝飛機嗰陣嘅生產效率，佢哋由得到嘅數據當中發現咗所謂嘅「80% 學習曲線」法則，指出喺航空工業當中，組裝飛機嘅工人會愈做愈熟手，而隨住工人學習，組裝飛機嘅成本平均會下降 20% 左右。認知科學同人因工程學上會用學習曲線（learning curve）嘅數學模型模擬呢種現象，學習曲線最基本條式如下：

一班工人喺一條裝配線上係噉整朱古力，一路整一路變到愈嚟愈熟手，愈熟手就愈做得愈快手。

$y=C_{1}x^{b}$；

當中 $y$ 可以係「完成下一件生產所需嘅時間或者成本」（一個理論上會隨住學習而數值下降嘅指標）；$x$ 係總共生產咗嘅件數；$C_{1}$ 係指第一件產出花咗嘅時間或者成本；而 $b$ 呢個參數（$-1<b<0$）係條線嘅斜率，反映個工人嘅學習率（learning rate）－$b$ 嘅數值細（即係接近 -1）反映個工人完成一件生產所需嘅時間成本會快速下降，表示個工人學得快，而相反 $b$ 數值大（接近 0）就表示嗰個工人學得慢，做極 $y$ 嘅數值都唔明顯跌。

經驗學習曲線會用類似噉嘅式（不過 $y$ 變成「一間工廠嘅產量」），模擬產量隨生產經驗嘅變化，喺管理上可以用嚟預測自己啲工廠跟住落嚟嘅產量會係點。

睇埋

• 生產
• 經濟模型
• 學習曲線