維基百科

維也納愛樂樂團

(由維也納愛樂跳轉過嚟)

維也納愛樂 (VPO; 德文：Wiener Philharmoniker) 成立於1842年，被譽為世界上最優秀嘅管弦樂團之一，[1][2][3]以每年演奏維也納新年音樂會而著名。

狄遜多馬士指揮維也納愛樂係紐約演出現場

維也納愛樂主場係維也納樂友協會大廳。成員選自維也納國立歌劇院，至少有3年經驗、年齡35歲以上嘅團員。


歷史

編輯

草創之初

編輯

西元1830年代之前，維也納當地嘅樂團表演，只有「即興」音樂會，由水平參差不齊嘅樂手臨時拉伕，逐場計咁為音樂會組隊。直到1833年，維也納愛樂前身出現，藝術家協會由維也納宮廷歌劇院嘅音樂家組成，舉行過4場音樂會，包括演奏貝多芬嘅交響樂。[4]時間去到1842年，多位係「愛神酒吧 Zum Amor」經常聚會嘅文化人，包括作曲家尼高拉 Otto Nicolai 在內，決意組成維也納愛樂：由宮廷音樂會嘅樂師組成，所有決定都由團員民主投票決定嘅完全獨立樂團，日常運作交由團員互選嘅行政委員會處理。[5]


尼高拉係1842年3月28號指揮咗維也納愛樂首場音樂會，[4]雖然佢後來只係指揮咗11場音樂會，1847年就離開維也納，愛樂樂團都差啲執笠。1854年起，維也納宮廷歌劇院常任指揮 Karl Eckert 開始接手維也納愛樂嘅音樂會。[6] 1860年，佢更開始指揮咗四場套票音樂會，被認為係愛樂音樂定期套票音樂會嘅始祖。[7]

常駐指揮時期

編輯

1860年，樂團選出 Otto Dessoff出任常任指揮。佢擔任常任指揮15年間，[8]樂團重大演出包括1873年，布拉姆斯親自指揮咗「海頓主題變奏曲」嘅全球首演。[9]

1875年，樂團選擇咗 Hans Richter 出任常任指揮，任期間同樂團全球首演咗布拉姆斯第二、第三交響樂、柴可夫斯基小提琴協奏區同布魯克納第八交響樂。[10] Richter 任期直至1898年辭職為止。[11]

1898年9月，維也納愛樂選咗著名作曲家馬勒作為樂團常任指揮。[12]但馬勒嘅任期，一直被支持前指揮 Richter 嘅樂手反對下，導致關係緊張[13]，拖到1901年馬勒最終辭職。[14]而樂團係期間1900年，首次出國巡演，係巴黎嘅世界博覽會演出。[14] Joseph Hellmesberger, Jr. 稍後取代馬勒，成為樂團指揮到1903年。直至1908年溫加特拿 Felix Weingartner 上任，樂團一度無再請到常任指揮，

溫加特拿任期到1927年，包括1922年帶領樂團首次巡演南美。[15]1927年，德國大指揮家富特溫格勒接任常任指揮，但3年後離任。[16]

1930年，高魯斯 Clemens Krauss 接任常任指揮，直到1933年[17]，並係薩爾斯堡音樂節，開始咗新年音樂會前身，向約翰史特勞斯家族致敬嘅音樂會。[18]

1933至1945

編輯

1933年後，維也納愛樂不再設套票音樂會常任指揮，富特溫格勒成為主要指揮[19]，部分文獻指華爾達係同富特溫格勒平分秋色，直至奧地利被納粹兼併以後[4]。

其他1930年代中與維也納愛樂合作嘅指揮包括，托斯卡尼尼、溫加特拿、 卡尼柏布斯 Hans Knappertsbusch、克倫貝勒 Otto Klemperer、 Adrian Boult、Victor de Sabata及George Szell。華爾達係1938年2月20號，指揮被納粹趕走前最後一場音樂會，當中包括布魯克納第四交響樂嘅世界首演。[20]而納粹期間樂團嘅作為，係2000年打後陸續被各界討論。

二戰結束後，富特溫格勒、卡尼柏布斯、高魯斯、孟格堡 Willem Mengelberg 同 Karl Böhm 陸續成為樂團嘅主要指揮。[21]

二戰至今

編輯

係戰後，多名世界級嘅指揮家曾經執掌維也納愛樂嘅音樂會，包括巴比洛利 John Barbirolli、紀連尼 Carlo Maria Giulini、艾力克‧卡拉伯、李雲 James Levine、梅達 Zubin Mehta、賴恩納 Fritz Reiner、蘇堤 Georg Solti、亞巴度 Claudio Abbado、梅狄 Riccardo Muti、亞奴閣 Nikolaus Harnoncourt、馬素爾 Lorin Maazel、楊遜斯 Mariss Jansons、巴倫邦 Daniel Barenboim、 杜達美 Gustavo Dudamel、葛濟夫 Valery Gergiev 及韋沙-摩斯特Franz Welser-Möst。

樂團曾係六度訪港。首次訪港嘅1959年，更係由指揮帝皇卡拉揚領軍嘅首次亞洲巡迴嘅其中一站。[22][23]。1989年訪港更係當年香港藝術節，係英國指揮普列文帶領下公演六場。[24]。其後1995[25]、2006[26]、2011及2022年，分別係李雲、葛濟夫、艾遜巴赫 Chirstoph Eschenbach[27]及韋沙-摩斯特[28]指揮下帶團訪港。

自1941年每年元旦，維也納愛樂樂團都會公演維也納新年音樂會，主要演奏施特勞斯家族嘅音樂。早年由指揮 Clemens Krauss 、 Josef Krips 及樂團首席 Willi Boskovsky 負責執棒。1980年代起，馬素爾 Lorin Maazel 曾指揮7次新年音樂會，直到1987年起，每年愛樂團員會選舉唔同指揮輪流執掌。[29]

文化同藝術地位

編輯
 
係台北場外聆聽維也納愛樂巡演音樂會直播嘅聽眾

2006年，係一份由7份歐洲音樂雜誌、2個電台同日內瓦論壇報嘅評選中，維也納愛樂被評為歐洲最佳樂團。[30] 2008年嘅英國留聲機雜誌集合嘅樂評人評選中，維也納愛樂則排名世界第三。[31]

維也納愛樂都經常被當成奧地利嘅文化大使。奧地利航空就曾有一隻空中巴士A340，被命名為「維也納愛樂號」，主要用黎飛來往維也納到東京嘅航線。[32]

年度舞會都係樂團盛事，1924年嘅首場舞會更係作曲家理查史特勞斯開始指揮生涯嘅重要時刻。[33]


商業架構

編輯

維也納愛樂以「民主自治」模式運作，同其他為樂團打工嘅安排唔同，所有正式成員都管理層嘅一份子。平日嘅運作則由團員互選產生嘅行政委員會處理，委員12人，[34]

維也納愛樂自1908年起，就獲得政府認可公司註冊。

獨特嘅音色

編輯

維也納愛樂嘅音色，經常被譽為與眾不同。大指揮家華爾達係1960年接受奧地利電台訪問時，1897年第一次聽到維也納愛樂嘅聲音係「改變生命嘅印象」：「維也納愛樂嘅樂音係我前所未聞嘅樂音，係佳音應如此。我前所位聞過咁靚咁平靜嘅聲音，果種滑音、振音嘅藝術、弦樂之音，木管，銅管嘅平衡同敲擊樂融入成個樂團，構成完美嘅聲音。我對呢個聲音印象深刻，我可以講樂團1897年至今始終如一。」[35]

樂器

編輯

維也納愛樂有唔少對樂器嘅獨特運用，構成咗獨特嘅音色。[36]

  • 樂團嘅音準，A音係443 赫茲 而非一般嘅440 赫茲。
  • 樂團使用德制嘅 Öhler 單簧管，其他非德語樂團嘅 Boehm 系統單簧管。
  • 樂團樂手使用嘅 Heckel 巴松管時，不會用振音吹奏。
  • 樂團使用轉閥式小號，甚至選擇轉閥較細嘅Heckel或Lechner生產嘅小號。
  • 樂團使用轉閥式大號，而且同德奧俄樂團一般，低音大號為F音準、超低音為降B音準。
  • 長號嘅孔徑稍小，雖然德國多數樂團都一樣。
  • 定音鼓堅持用山羊皮，直到20世紀初係團員自製，而且至今維持手動調音。
  • 低音提琴位置係管樂之後，樂手使用德式弓嘅變體，只用食指同中指對琴弦施壓，而非一般嘅拇指。
  • 獨特嘅維也納雙簧管，而非一般嘅法式雙簧管。
  • 獨特嘅維也納圓號，維持係19世紀中期嘅運作模式，非常符合樂團嘅曲目範圍。

其他樂器，至少根據維也納愛樂網頁，同一般樂團相對一樣。例如長笛同一般樂團一樣，但係1920年前依然沿用木管。而愛樂嘅弦樂部係獨特音色嘅組成部分，但愛樂網頁則強調樂器並無「特別出色」。[36] 然而事實上，樂團使用唔少名琴，例如多把史特拉第瓦里名琴，都係奧地利中央銀行負責借出。[37]

樂團樂器以及其音色，一直都係維也納音樂演藝大學旗下，音樂聲學院嘅調查課題。[38] 愛樂自己網站總結道：「除咗長笛，同某程度而言巴松管外，維也納樂器總體而言，泛音比較豐厚，或者音調比較明亮。」[36]

演奏風格

編輯

華爾達係1960年嘅專訪，更加引述咗樂評人 Richard Specht 係1919年嘅著作，表示維也納愛樂嘅「小提琴部嘅顫音同熱情嘅精湛技藝係獨一無二嘅。 [39]」

至於其他樂器，音樂學者 Robert Philip 指出，二戰前長笛好少吹奏顫音。[40] 雙簧管甚至去到1940年代末先開始顫音。[41] 英國管去到1940年代末都未見，巴松管更加去到1950年代都未見顫音。[42]

弦樂方面，Philip 指出，自1931年起，維也納愛樂開始統一弓法，該習慣係當時英國樂團仍未流行。[43]二戰之後，滑音梗係大大減少，係1949年同指揮卡拉揚嘅錄音，只有「唔明顯嘅滑音」[44]。

爭議

編輯

女性及非歐裔團員

編輯

維也納愛樂比起其他全球主要樂團，遲好多到1997年先接受女性成為正式團員。[31] 甚至係1996年2月，長笛首席 Dieter Flury 對西德廣播公司表示，接受女性團員係「同現時樂團嘅整體情感(emotionelle Geschlossenheit)對賭」。[45]1996年4月，樂團嘅新聞秘書回應奧地利政府婦女部資訊文件表示，無法接受團員嘅其中一個問題，如何引對產假產生嘅空缺。[46]

1997年2月， 奧地利總理 Viktor Klima 罕有係頒獎典禮告誡樂團， 希望佢地可以「發掘另一半人類嘅潛能並加以利用」。[47] 係當年嘅美國巡演，紐約時報報導，樂團會面對全美婦女組織同國際音樂女性聯盟嘅抗議。當年2月28號，樂團最終召開特別大會，接受豎琴手 Anna Lelkes 成為正式會員。[47] Lelkes 1974年起已經同樂團合作，但一路唔係正式會員。佢憶述美國嘅示威威脅係絕對嘅主要推手。而佢表示當時樂團都唔係全員通過佢加入，只係大比數，而且後生一代支持佢嘅較多。[48]

直到2013年，樂團僅有6位女性成員。小提琴 Albena Danailova 係2008年成為樂團嘅首位女首席。[49] 2005年1月，澳洲指揮 Simone Young 成為樂團首位女指揮。係2012年底，男女比例問題依然係媒體關注樂團嘅議題。奧地利廣播公司 ORF 報導[50]，樂團只有6%嘅女性團員，相比柏林愛樂 14%、倫敦交響樂團 30%、紐約愛樂36%。報導承認有改善進展，但表示進度慢到惹人關注。樂團回應指已經盡力，係不分性別嘅公平甄選嘅結果依然如此。[51]而到2019年12月，樂團表列有15位女性成員。[52]

唔接受非歐裔團員，都係樂團爭議之一。[53] 1970年，維也納愛樂前主席 Otto Strasser 嘅回憶錄就表示對樂手係屏風後遮面考核表示反感。更指出試過一名日本通過測試，但最後無被聘請。[54] 1996年，首席長笛 Flury 嘅爭議訪問中暗示，「樂團靈魂無法同中歐嘅文化根基分離」。[45]

而到2001年，終於有位半亞裔樂手被選入小提琴部。[54]

與納粹黨合作

編輯

係被德國兼併年間，維也納愛樂被指與納粹黨合作嘅歷史，近年都成為樂團嘅爭議。[55] 但面對歷史或音樂學者要求調閱該年代資料，樂團管理層往往會說不。[56] 就算學者獲得許可，[57][58]但都會遇到延遲送達文件，或者不情願地提供文件。[59]

2013年新年音樂會前後，歷史學者對新年音樂會嘅起源有納粹淵源，再次引發輿論對樂團係二戰年間嘅歷史嘅議論，[60]並引發國會議員嘅抨擊。[61]時任樂團主席 Clemens Hellsberg 最後委任三名歷史學者，包括之前調查被拒嘅學者，研究樂團當年所有文件，並承諾將結果發布上網。[62]

當年3月10號，調查團發布調查結果，[63][64] 主要結論包括：

  • 1930年代中，已有20%樂團成員加入納粹黨。當時係奧地利納粹黨依然係非法政黨，加入者意識形態應該相當堅振。[65]
  • 1942年，123名團員中60人係活躍納粹黨員，達 48.8%。2人甚至係黨衛隊成員。相比之下只有20%柏林愛樂成員係納粹黨員。[56][66] 奧地利全國都只有10%嘅人係納粹黨員。[67]
  • 13名猶太樂團成員被納粹黨驅逐，6人被迫流亡、7人被殺，其中5人死於集中營、2人死於維也納等待期間。
  • 被迫流亡嘅樂團成員總共有9人，包括6名猶太人。11人因有猶太妻子，而被標籤為「半猶太人」，面對留團嘅「特殊批准」隨時被撤銷嘅威脅。最後有兩人都被逐，其餘11人係富特溫格勒干預下，先得以留低。
  • 填補被逐樂樂團成員嘅新樂手，一半係納粹黨員。[68]
  • 調查挖出新事證，指出維也納愛樂新年音樂會，如何係納粹時候起源。1939年除夕嘅音樂會，由指揮高魯斯提議，獲得納粹宣傳部長戈培爾嘅熱情批准，因為符合納粹黨嘅娛樂宣傳事業。[69] 而該場音樂會嘅收益，全部捐俾納粹黨嘅「冬季戰事籌款活動」。[18] 報導指戈培爾刻意無視約翰史特勞斯嘅猶太血統，表示因為無法驗證，同貶低德國文化傳統。[69]
  • 戰爭結束後，1945年樂團驅逐10名涉及納粹活動嘅團員。然而2人後來俾重新聘用，當中包括小號手禾比殊 Helmut Wobisch。禾比殊1933年加入納粹黨，1934年加入黨衛軍，戰時更為蓋世太保做間諜。1950年佢被樂團重新聘用，1953年更被樂團選為行政總監，一直擔任到1967年。
  • 禾比殊嘅爭議決定包括，1966年決定將複製樂團指環，送俾當時啱啱出獄嘅納粹維也納大區長官席拉赫 Baldur von Schirach。[70] 因此係2013年，有紀念禾比殊嘅音樂會，因報告而被立即取消。[71]
  • 愛樂曾給予多名納粹官員樂團榮譽，包括上述給與嘅席拉赫嘅指環，以及納粹黨首位奧地利總理賽斯-英夸特。樂團內部文件顯示，計畫係1942年授予希特拉，但無證據最終有俾到。[72] [73]

最終係同年10月23號嘅年度大會，樂團投票決定削除所有納粹官員嘅榮譽。投票前樂團聽取咗調查團嘅報告，[74] 樂團主席表示，削除決議無需進一步討論，因為決定走向相當明顯。[74]

參考資料

編輯
  1. ↑ "Salzburg Festival – 27 July to 30 August, 2011". Salzburgerfestspiele.at. 原著喺2012-09-10歸檔. 喺17 November 2013搵到.
  2. ↑ Reiner, Fritz. "Chicago Symphony Tops U.S. Orchestras". NPR.org. NPR. 喺17 November 2013搵到.
  3. ↑ Hoyle, Ben (21 November 2008). "LSO is only British orchestra in list of worlds best". The Times. London. 原著喺2011-06-16歸檔. 喺27 May 2010搵到.
  4. ↑ 4.0 4.1 4.2 Mosco Carner, "Vienna," section 5, iv (c), in The New Grove Dictionary of Music and Musicians, 1980, volume 19, p. 730
  5. ↑ "Vienna Philharmonic | Orchestra, Concerts, New Years Concert". Wienerphilharmoniker.at. 原著喺24 May 2013歸檔. 喺29 April 2013搵到.
  6. ↑ Mosco Carner, "Vienna," section 5, iv (c), in The New Grove Dictionary of Music and Musicians, 1980, volume 19, p. 724
  7. ↑ Hellsberg, Clemans. "The History of the Vienna Philharmonic: The Philharmonic Subscription Concerts". Wiener Philharmoniker. v. 喺2024-05-17搵到.
  8. ↑ Joachim Draheim, Gerhard Albert Jahn (Editors.): Otto Dessoff (1835 - 1892). Ein Dirigent, Komponist und Weggefährte von Johannes Brahms; anlässlich der Otto-Dessoff-Ausstellung in Karlsruhe, Wien, Baden-Baden, Chemnitz, Dresden, Frankfurt am Main, Kassel, Leipzig und Zwickau. hrsg. von Joachim Draheim, Gerhard Albert Jahn und dem Verein der Freunde der Wiener Philharmoniker. - München: Musikverlag Katzbichler, 2001, 196 S., ISBN 978-3-87397-590-3
  9. ↑ Styra Avins and Josef Eisinger, Johannes Brahms: Life and Letters, Oxford University Press, 1997, p. 778, ISBN 978-0-19-816234-6
  10. ↑ Christopher Fifield, True Artist and True Friend: A Biography of Hans Richter, Oxford: Clarendon Press, 1993, p. 161
  11. ↑ Christopher Fifield, True Artist and True Friend: A Biography of Hans Richter, p. 268
  12. ↑ Jens Malte Fischer (translated by Stewart Spencer), Gustav Mahler, Yale University Press, 2011, p. 316, ISBN 978-0-300-13444-5
  13. ↑ Fifield, True Artist and True Friend, p. 270
  14. ↑ 14.0 14.1 Jens Malte Fischer, Gustav Mahler, p. 317
  15. ↑ Raymond Holden, The Virtuoso Conductors: the Central European Tradition from Wagner to Karajan, Yale University Press, 2005, p. 108
  16. ↑ Raymond Holden, The Virtuoso Conductors, p. 217
  17. ↑ Charles Barber, Corresponding with Carlos: A Biography of Carlos Kleiber, Scarecrow Press, 2011, p. 15
  18. ↑ 18.0 18.1 "New Year's Concert: History | Vienna Philharmonic". Wienerphilharmoniker.at. 原著喺12 April 2013歸檔. 喺29 April 2013搵到.
  19. ↑ "Vienna Philharmonic | Orchestra, Concerts, New Years Concert". Wienerphilharmoniker.at. 原著喺24 May 2013歸檔. 喺29 April 2013搵到.
  20. ↑ http://www.wienerphilharmoniker.at/upload/files/torberg_hell_dank_en_hs_v01.pdf [失咗效嘅鏈]
  21. ↑ "Furtwängler and the Vienna Philharmonic | Furtwängler – Tahra". Furtwangler.net. 原著喺2013年5月27號歸檔. 喺29 April 2013搵到.
  22. ↑ "SONNTAG, 25. OKTOBER 1959 Konzert in Hongkong". Wiener Philharmoniker. Wiener Philharmoniker.
  23. ↑ 〈維也納管絃樂隊抵港〉。《華僑日報》。香港 : 華僑日報有限公司。1959-10-25。喺2024-05-17搵到。
  24. ↑ 〈應藝術節邀請卅年後重臨香江維也納管弦樂團昨來港演出六場門券售馨增設企位票當日發售〉。《大公報》。大公報。1989-02-15。喺2024-05-17搵到。
  25. ↑ "SONNTAG, 29. OKTOBER 1995 Konzert in Hongkong". Wiener Philharmoniker. Wiener Philharmoniker. 喺2024-05-17搵到.
  26. ↑ "SONNTAG, 24. SEPTEMBER 2006 Konzert in Hongkong". Wiener Philharmoniker. Wiener Philharmoniker. 喺2024-05-17搵到.
  27. ↑ 〈維也納愛樂樂團載譽重臨　只演一場〉。《政府新聞網》。香港特別行政區政府。喺2024-05-17搵到。
  28. ↑ 〈維也納愛樂樂團本月重臨香江　音樂會門票十月十日開售〉。《政府新聞網》。香港特別行政區政府。喺2024-05-17搵到。
  29. ↑ "NEUJAHRSKONZERT Tradition und Geschichte". Wiener Philharmoniker. 喺17 May 2024搵到.
  30. ↑ Hellsberg, Clemens (21 11月 2006). "Vienna Philharmonic Named Europe's Finest Orchestra". HuliQ. 原著喺17 9月 2012歸檔. 喺18 6月 2007搵到.
  31. ↑ 31.0 31.1 "The world's greatest orchestras". gramophone.co.uk. 喺29 April 2013搵到.
  32. ↑ Münze Österreich AG (1 November 2006). "Der "Wiener Philharmoniker-Airbus" ist startklar" (German). Pressetext Austria. 喺18 June 2007搵到.{{cite web}}: CS1 maint: unrecognized language (link)
  33. ↑ Zamborsky, Kevin; Peterson, Stephen. "Concert: Ithaca College Wind Ensemble". digitalcommons.ithaca.edu. Ithaca College.
  34. ↑ "Democratic Self-Administration". 喺29 December 2016搵到.
  35. ↑ David Hurwitz, "'So klingt Wien': Conductors, Orchestras, and Vibrato in the Nineteenth and Early Twentieth Centuries," Music and Letters, February 2012, vol 93 issue 1, pp. 29-60. Hurwitz also offers Walter's German in transcription, including, "So soll ein Orchester klingen, so soll es spielen, das hatte ich noch niemals gehört, die Schönheit, diese Ruhe des Klanges, diese Art von Glissando, die Art von Vibrato, der Streicherklang, die Mischung von Holz mit Streichern, mit Blech, das Maß im Blech, das sich einfügte mit dem Schlagzeug zusammen in den Gesamtklang des Orchesters. Für mich war dieser Eindruck lebensentscheidend, und jetzt möchte ich etwas vorgreifen und Ihnen folgendes sagen: Dieser Klang, 1897, ist heute der gleiche."
  36. ↑ 36.0 36.1 36.2 "Vienna Philharmonic | Viennese Sound". Wienerphilharmoniker.at. 原著喺9 January 2012歸檔. 喺29 April 2013搵到.
  37. ↑ 維也納音樂藝術大學網上雜誌
  38. ↑ "Viennese Music Tradition - Institute of Music Acoustics (Wiener Klangstil)". Iwk.mdw.ac.at. 喺5 October 2013搵到.
  39. ↑ David Hurwitz, "'So klingt Wien': Conductors, Orchestras, and Vibrato in the Nineteenth and Early Twentieth Centuries," Music and Letters, February 2012, vol 93 issue 1, pp. 29-60
  40. ↑ Robert Philip, Early Recordings and Musical Style: Changing Tastes in Instrumental Performance, 1900–1950, Cambridge University Press, 1992, pp. 116–18
  41. ↑ Philip, Early Recordings, pp. 125–26
  42. ↑ Philip, Early Recordings, p. 137
  43. ↑ Philip, Early Recordings, p. 180
  44. ↑ Philip, Early Recordings, pp. 192–93
  45. ↑ 45.0 45.1 Westdeutscher Rundfunk Radio 5, "Musikalische Misogynie", 13 February 1996, transcribed by Regina Himmelbauer; translation by William Osborne
  46. ↑ "The Vienna Philharmonic's Letter of Response to the Gen-Mus List". Osborne-conant.org. 25 February 1996. 喺5 October 2013搵到.
  47. ↑ 47.0 47.1 Jane Perlez, "Vienna Philharmonic Lets Women Join in Harmony”, The New York Times, 28 February 1997
  48. ↑ Heinz Rogle, "Notes on 26 Years as Official Nonentity", 1 March 1997, Salzburger Nachrichten; translated Mike Wiessner and published by the Los Angeles Times, 5 March 1997
  49. ↑ Vienna opera appoints first ever female concertmaster 互聯網檔案館嘅歸檔，歸檔日期28 October 2013., France 24
  50. ↑ "Wenige Frauen bei Wiener Philharmonikern", 28 December 2012
  51. ↑ James R. Oestrich, "Even Legends Adjust To Time and Trend, Even the Vienna Philharmonic", The New York Times, 28 February 1998
  52. ↑ New York Times, 23 December 2019, When an Orchestra Was No Place for a Woman, by Farah Nayeri. Accessed 7 April 2020.
  53. ↑ "The Image of Purity: The Racial Ideology of the Vienna Philharmonic In Historical Perspective" by William Osborne
  54. ↑ 54.0 54.1 Osborne, William. "Why Did the Vienna Philharmonic Fire Yasuto Sugiyama?". Osborne-Conant.org. 喺18 June 2007搵到.
  55. ↑ Georgina Prodhan, "Vienna Philharmonic lifts lid on Nazi history", Reuters, 9 March 2013
  56. ↑ 56.0 56.1 Fritz Trümpi, "The Vienna Philharmonic's Nazi past: lifting the veil of deliberate ignorance", The Guardian, 17 March 2013
  57. ↑ NewsA/T, "Ausstellung zum Anschluss: Staatsoper stellt sich der eigenen Vergangenheit", 10 March 2008
  58. ↑ Anne-Catherine Simon, "Hellsberg unter Beschuss: 'Absurd und infam'", Die Presse, 5 March 2008
  59. ↑ Sebastian Huebel, The Reichsorchester – A Comparison of the Berlin and Vienna Philharmonics during the Third Reich, Master's thesis, Department of History, University of Victoria, 2009, p. 9
  60. ↑ Norbert Rief, "Wiener Philharmoniker: NS-Ideologie im Walzertakt?", Die Presse, 29 December 2012
  61. ↑ "Anmelden". Haraldwalser.twoday.net. 喺29 April 2013搵到.
  62. ↑ Kerry Skyring, "The Vienna Philharmonic reveals its Nazi past", Deutsche Welle, 12 March 2013
  63. ↑ "4. National Socialism - Vienna Philharmonic".
  64. ↑ "Vienna Philharmonic | Orchestra, Concerts, New Years Concert". Wienerphilharmoniker.at. 14 July 1942. 原著喺17 May 2013歸檔. 喺29 April 2013搵到.
  65. ↑ Thomas Trenkler, "Ioan Holender: 'Pereiras Programm ist kommerziell und konservativ'", 27 March 2013, Der Standard
  66. ↑ Complete documentation is in Trümpi's 2011 book, Politisierte Orchester: Die Wiener Philharmoniker und das Berliner Philharmonische Orchester im Nationalsozialismus (Böhlau Verlag, Köln 2011, ISBN 978-3-205-78657-3)
  67. ↑ Judt, Tony. Postwar: A History of Europe Since 1945, p. 52, Penguin Press, 2005
  68. ↑ Audio clip by Rathkolb, posted by Brian Wise on his WQXR-FM blog in the story, "Behind The Vienna Philharmonic's Nazi Past" on 14 March 2013
  69. ↑ 69.0 69.1 "Denn erstens ist es noch nicht erwiesen, und zweitens habe ich keine Lust, den ganzen deutschen Kulturbesitz so nach und nach unterhöhlen zu lassen." In Oliver Rathkolb, "Vom Johann-Strauß-Konzert 1939 zum Neujahrskonzert 1946" 互聯網檔案館嘅歸檔，歸檔日期4 May 2013.
  70. ↑ This re-awarding was first brought to light in a 2005 book by Schirach's son, Richard von Schirach, but the person responsible was identified only as "a professor from Vienna" who "came as a secret emissary of the Vienna Philharmonic." Richard von Schirach, Der Schatten meines Vaters – Munich: Carl Hanser Verlag, 2005, ISBN 978-3-446-20669-4. The panel learned that the secret emissary was Wobisch not from the archives but from someone whom Rathkolb called "a highly trustworthy and well-informed witness" – the historian Wilhelm Bettelheim, who disclosed it in a handwritten letter dated 19 January 2013; he had been given the information in 1968 by Josef Krips. (Oliver Rathkolb, "Ehrungen und Auszeichnungen (Ehrenmitglieder, Ehrenring, Nicolai-Medaille und die 'gelbe' Liste)" 互聯網檔案館嘅歸檔，歸檔日期4 May 2013., part 4)
  71. ↑ "NS-Debatte erreicht Kärntner Musikfestival", Die Presse, 18 March 2013
  72. ↑ Oliver Rathkolb, "Ehrungen und Auszeichnungen (Ehrenmitglieder, Ehrenring, Nicolai-Medaille und die 'gelbe' Liste)"[失咗效嘅鏈], part 1
  73. ↑ Luke Harding and Louise Osborne, "Vienna Philharmonic and the Jewish musicians who perished under Hitler", The Guardian, 11 March 2013
  74. ↑ 74.0 74.1 James R. Oestreich, "Vienna Philharmonic Revokes Nazi Honors", The New York Times, 22 December 2013

拎

編輯
由「https://zh-yue.wikipedia.org/w/index.php?title=維也納愛樂樂團&oldid=2209866」收