羅浮山（粵拼：lo4 fau4 saan1），或者就咁叫羅浮，係中國廣東名山，橫跨今日博羅縣、龍門縣、增城市三地。因為同西樵齊名，所以又叫東樵或者東樵山（樵讀潮，粵拼：dung1 ciu4 saan1）。
羅字喺古百越話裏便，就係山嘅意思[1]。廣東、廣西重有好多羅字頭嘅地方，都係山咁解。
據清人李調元喺《南越筆記》裏面寫：「羅浮有啞虎，不嘯不咥。相傳葛真人上升，留二丹粒以與其隸黃野及啞虎食，為羅浮四庵守者。今衝虛觀葛真人像旁有黃野及一蹲虎，是必啞虎也。」
