羅鷹石家族

羅鷹石家族係鷹君集團創辦人羅鷹石嘅家族，祖籍普寧。家族入面嘅羅嘉瑞、羅旭瑞、羅康瑞同羅啟瑞都揸住自己嘅上市公司，喺香港嚟講係好少有嘅。

歷史

羅鷹石細細個已經跟老豆做生意，1938年同兄弟嚟到香港開疋頭行，1951年嗰時同兄弟分家，攞到10萬繼續布匹生意。^[1]後來搞地產，喺1963年創立鷹君，起咗唔少住宅大廈，不過更加多嘅係工廠大廈。

到1972年，鷹君上市，乘住當時股市暢旺，鷹君當時得到快速嘅發展，開始涉獵埋酒店同金融嘅業務。但係到1982年，鷹君發展太快，加上香港前途問題影響地產市道，羅旭瑞聯同「公司醫生」韋理狙擊老豆嘅百利保同富豪酒店，變成自己嘅公司。兩父子更加反咗面，到後來先好返。

公司後來交由三仔羅嘉瑞打骰。並且將鷹君嘅負債還清。日後鷹君嘅發展步伐減慢咗，主要變成一隻收租股。

2016年，羅家嘅大家長羅杜莉君（羅老太）入稟法院，要求換咗家族基金嘅信託人。到2018年，鷹君爭產案正式開審，家族入面更加分成支持羅嘉瑞同羅老太兩個陣營^[2]。經過一輪審訊之後，法院最後裁定羅老太一方敗訴。羅老太後來上訴亦都被駁回。

另外羅老太喺爭產案嗰時同傳媒茶聚，突然間講話有啲仔女唔係親生嘅，不過當時矛頭就指向支持羅老太嘅二仔羅旭瑞嗰度。因為羅旭瑞嘅出世紙上面，生母一欄係寫住「李意奇」，而唔係杜莉君，羅旭瑞就回應話佢喺三年零八個月期間出世，當時阿媽係用呢個別名去攞飯票，所以用咗呢個名登記出世紙，而杜莉君亦都喺重光後證明李意奇就係佢本人^[3]。