美國史可以追溯到17世紀頭,英國開始向北美洲東岸殖民,侵佔美洲土著嘅土地。之後因為英國本土壓榨北美殖民地,引發美國革命,1776年7月4號發佈《美國獨立宣言》,脫離大英帝國統治,成立獨立嘅美利堅合眾國。

美國立國後第一面旗

美國獨立後,積極喺北美洲擴張領土,令領土擴展到北美洲西岸,史稱美國西進運動

19世紀中,因為美國北部同南部對奴隸制度存廢嘅分歧,當支持廢奴嘅林肯喺1860年當選總統後,南方州份喺1861年脫離聯邦,另組美利堅聯盟國,爆發南北戰爭,最後聯邦贏咗,美國恢復統一。

踏入20世紀,因為第一次世界大戰重創歐洲,令美國國勢開始崛起,不過1920年代尾爆發大蕭條,嚴重影響美國經濟。

第二次世界大戰初期,美國置身事外,但1941年底太平洋戰爭爆發,被逼捲入戰爭,加入同盟國對抗軸心國,最後美國研發出核武,令同盟國打贏仗。

二戰後,美國受到嘅損害遠比歐洲各國低,令美國變成第一大強國。意識形態唔同嘅蘇聯唔想美國獨大,同佢打對臺,引發冷戰,去到1980年代尾蘇聯解體而結束,美國繼續維持住第一大強國嘅地位。