美洲豹

  「美洲虎」跳轉到呢度。想搵其他用法，請睇「美洲虎 (搞清楚)」。

美洲豹（學名：Panthera onca），又叫做美洲虎，係世界上第三大嘅豹屬動物，亦係西半球最大型嘅貓科動物，外表形態同豹極之相似，但係較粗壯，圓斑中有黑點，毛色亦較為深黃。同老虎一樣係食物鏈嘅頂級捕獵者。佢係美洲地區唯一嘅豹屬動物。

How to read a taxobox 美洲豹
香港動植物公園曾經養過嘅美洲豹（生前嘅相）
瀕危指標
就快受威脅（Near Threatened） (NT)
物種分類
界 動物界 門 脊索動物門 綱 哺乳綱 目 食肉目 科 貓科 屬 豹屬 種 美洲豹種
二元學名
Panthera onca Linnaeus, 1758
美洲豹嘅而家分布（綠），以前嘅分布（紅）

美洲豹

美洲豹黑色變種

體型同外表

體長 1.62 到 1.82 米，體重 56 至 96 千克，有啲可以重到 130 千克。外表似虎豹綜合體，肩臀較壯，黑斑中有圓點，四肢同下側腹則形成較大嘅黑點，背脊嘅黑斑有形成一條線嘅橫紋。同豹一樣會有黑化嘅個體。

分布地同棲息環境

從美國佛羅里達州直到阿根廷中部，喺雨林、沙漠同埋高山都有，但主要偏好近水嘅生境。

食物同生態地位

具領域性，可互相重疊，豹公領域大細係豹乸兩倍，可能同幾隻豹乸重疊，活動範圍大約 2000 到 3000 米，最大可將近 60 千米。會發出多種叫聲，表達情緒。美洲豹亦都貓科中唯一以襲擊獵物頭骨作為捕獵技巧嘅動物，力大幾乎及得上獅子，可以拖住一隻牛長途咁行。利齒亦有咬碎獵物頭骨以及龜殼嘅能力。

響南美洲食物鏈上端，食物包括魚、水豚、鹿、剌鼠、野豬、淡水龜等，甚至係牙尖嘴利嘅鱷魚。近年研究亦發現美洲豹原來有食腐肉嘅習性。

生殖

豹乸成年都可以生仔，但各地生殖高峰期無一定，懷孕期大約 90 到 110 日，一胎大約生一到四隻，豹仔兩到十天後會開眼。

保育現狀

由於美洲豹所居住嘅環境一直受到破壞，加上人類對皮毛嘅需求，傷害家畜等種種理由，令美洲豹數目日漸減少。

美洲豹係香港動植物公園嘅「鎮園之寶」，曾經養咗四隻，佢哋分別住響大型美洲豹籠舍內。個籠舍喺兒童遊樂場斜對面，喺1994年完成，面積比起原先位於獸籠入口旁邊，喺1976年完成嘅舊籠舍足足大成 4 倍。

2008年6月10日，最後一隻美洲豹「小花」老死，園方考慮到美洲豹需要更大嘅生存空間而唔再引入美洲豹來港。「小花」先後經歷「兩段情」：首任伴侶因為有先天性脊骨缺陷，被人道毀滅；繼任嘅「小黑」亦喺2003年死咗。