美獅美高梅

美獅美高梅（粵拼：mei5 si1 mei5 gou1 mui4；葡文／英文：MGM Cotai），係位於澳門路氹城嘅一座酒店連賭場建築，响2018年2月13號開幕。

大堂

呢個架步用咗港幣二百六十億整成，佔地四百萬平方呎，外觀設計得好似堆疊起嚟嘅珠寶盒，部件之間有位通窿，門口擺咗件高十一米重三十八噸嘅獅子雕塑，貼滿金箔。

設施

酒店大樓有兩座，高30層至36層，家陣有1,418間客房，檔次為五星級。

响2021年12月31號時，美獅美高梅娛樂場（英文／葡文：Casino MGM Cotai）嘅樓面面積約為27,696平方米，有839架老虎機及263張賭枱。

美高梅劇院（英文：MGM Theater）係亞洲首個多元化動感劇院，可以容納二千個觀眾，啲座椅有多過10種變化形態，LED顯示屏嘅面積為九百平方米——像素為冠絶於所有劇院嘅二千八百萬，亦設駐場表演。「視博廣場」係個無柱式結構，會因應時間、天氣及客人舉動而改變氣氛，又裝咗地球上最大嘅室內固定LED屏幕，會展示數碼藝術作品，重設有世界上最大嘅室內藝術花園「自然之藝」，所種植物超過十萬棵，品種唔止二千（包括二百多種蘭花），有大把係澳門及香港嘅原生品種。「美獅美高梅藝術收藏」展示逾三百件古今亞洲藝術品。呢座嘢嘅會議場地有二千八百七十平方米。

意外

喺地盤度，响2014年12月16號黃昏，有一大堆鐵片由高處下跌，𢱕傷咗兩個大陸男紥鐵工人——其中一個38歲，姓崔，個頭重傷；另外嗰個26歲，姓黃，整親膊頭及腳——均由救傷車車咗去醫院。

响2015年3月6號朝早10點，喺地盤度，由於斷咗吊鏈，一個由天秤吊住嘅水泥泵，傾側下墜，擊中咗個54歲趙姓內地男工。佢頭部重創，小腿亦骨折，被送到醫院搶救，延至中午不治。

地盤當中有架吊船，似乎由於機械失靈而翻側，令上面嘅兩個抹玻璃工人受傷入院——其中一個跌咗落街，傷及左額同左膝，清醒程度下降；另外嗰個左手擦傷。事發日子為2015年3月5號。

有個35歲男外勞，响2016年5月5號喺地盤裏面，唔小心跌咗落去個地坑度，傷及右胸。消防員到場救起咗佢，再送去醫院。

消防員响2018年5月21號晏晝4點左右接報出動，跟住喺酒店二樓救咗個69歲嘅酒店男職員去醫院；佢當時下頷出血，唔係完全清醒，似乎係人連梯架墮地所致。

大概响2019年6月8號上晝11點40分，地盤貨倉之內有油漆着火出煙，看更於是用水撲熄，之後嚟到嘅消防員亦射水冷卻；推斷係高温引起嘅油漆自燃。

罪案

有個換錢黨一共4人，响2021年12月6號，喺間酒店房道起咗爭執，到咗朝早大約10點半鐘時，當中39歲姓秦嘅男人，用切肉刀斬親1個男嘅條頸，受咗刀傷嘅重有其餘1男1女嘅手；3個均被送醫。佢哋統統都係大陸人；3個傷者年齡介乎18至36。

喺美獅美高梅9樓某間房入面，33歲嘅黑龍江男人趙玉龍，响2022年5月5號同2022年5月6號，先後劫殺換錢黨同高鐘妹；2個女人均死於勒頸。佢哋嘅屍體响2022年5月7號於房間被酒店職員發現時，均全身赤裸，而現場被清理過，證件同財物都揾唔到。凶手响2022年5月17號，喺湖南懷化市落網。