臺中捷運綠線

臺中捷運綠線係臺中捷運第一條開始興建同營運嘅路線，亦係臺中捷運三條核心路線之一。呢條路線行經臺中市嘅北屯區、北區、西屯區、南屯區、南區同埋烏日區（延伸線仲包括彰化縣嘅彰化市），喺松竹車站同大慶車站之間同台鐵台中線構成咗一個環狀路網。綠線採用鋼輪中運量運輸系統，成條線除咗北屯總站同高鐵台中站喺地面之外，其他所有車站同路段都係高架化嘅。