舞會
舞會（英文：Ball），又叫餐舞會，係一種西方正式嘅跳舞宴會，參加者要穿着晚禮服等正裝，舞會嘅最主要部分係由社交舞組成。
歷史 編輯
舞會早喺中世紀嘅時候就已經出現，並喺文藝復興時期得到進一步發展。舞會原本只係喺宮廷度舉行，而且通常喺晚上進行，直到17世紀以後先至喺大眾社會流行起嚟，而之後對於舞會本身同參加者嘅各項要求都逐步放寬。
禮儀 編輯
舞會係一個高尚而且講究禮儀嘅社交活動，舞會，亦係展示魅力嘅場所，所以參加舞會一定要注意以下禮儀[1]。
- 點樣邀請女方
當奏起舞曲之後，男方要大方噉行到女方面前邀請佢，如果女方嘅屋企人都喺度，就應該先向女方嘅親人扤吓頭示意，並得到佢哋同意之後，行到女方面前企直，小小彎腰同佢講：「小姐，可以同妳跳隻舞嘛？」有時可能要先得到陪緊女方嘅男士同意，對佢話：「先生，我可以請呢位小姐一齊跳舞嘛?」獲得同意之後，再同女方入到舞池度一齊跳舞。
- 唔好同同性別嘅人一齊跳舞
根據國際慣例，兩位男士一齊跳舞，係代表佢哋唔願意邀請喺在場嘅任何一位女性，無形中表明佢哋係基佬。亦盡量唔好兩位女士一齊跳舞，尤其是喺有特別嘉賓嘅情況之下，要特別留意。
- 當女方主動邀請嘅時候
一般情況之下，女士係唔需要主動邀請男士，不過喺特殊情況之下，需要請長者或者貴賓嘅時候，就可以用特別身份噉表達：「先生，請您賞面。」或者話：「我好榮幸，可以同您跳舞嘛?」
- 兩位男士同時發出邀請嘅時候
當女士面對兩位或以上嘅男士邀請，最能夠俾面佢哋嘅做法係，全部都謝絕佢哋。若果係兩位男士一前一後噉行過嚟邀請，就可以「先到先得」為順序，接受先到男士嘅邀請，同時誠懇噉對後面嗰位話：唔好意思，下次啦，並且盡量要遵守承諾。
- 可唔可以一直同同一個人跳舞?
依照慣例，出席舞會嘅通常都係一對男女噉去，只要跳完第一隻舞曲就已經足夠。喺第二隻舞曲開始，大家應該有意識噉交換舞伴，識多啲其他朋友。
- 唔好輕易拒絕邀請
舞會係透過跳舞結交朋友、同朋友見面嘅場合，所以喺舞會嘅女士唔能夠輕易拒絕其他人嘅邀請。女士可以拒絕個別「覺得唔係幾好」嘅男士嘅邀請，不過要注意講嘢嘅語氣，要有禮貌噉表示拒絕。
- 男士嘅紳士風度
喺舞會上最能夠體現一個人嘅紳士風度。例如：跳舞嗰陣要保持一定嘅距離，左手輕輕扶住舞伴嘅後腰（高過腰部少少），右手輕輕托住舞伴嘅右手，尤其是喺旋轉嘅時候，男士一定要舞步穩健，動作協調，同舞伴一齊享受華爾茲嘅優美。萬一，發現女士有啲頭暈，男士一定要做好「護花使者」，護送佢返到原位。喺一首舞曲結束之後，要有禮貌噉將女士送返原位，道謝之後，再去邀請另一位女士。
- 幾時離開舞會
無論係參加朋友嘅私人舞會，定係正式嘅大型舞會，守時係最主要嘅禮儀，要準時到。至於幾時離開舞會最適合，朋友嘅私人舞會最好要堅持到舞會完之後先至離開，亦係對朋友嘅支持。至於其他舞會，最好唔好只係跳完一隻舞就算，俾人覺得只係為咗應酬吓，要令人覺得真係有心去參加。
睇埋 編輯
參考 編輯
- Wallace, Carol McD.; 等 (1986). Dance: a very social history. New York: The Metropolitan Museum of Art. ISBN 9780870994869.
- ↑ 〈八種你必須知道的舞會禮儀知識〉. 原著喺2021年4月19號歸檔. 喺2021年4月18號搵到.