華爾茲

華爾茲waa4 ji5 zi1，用漢字又可以寫做華爾滋waa4 ji5 zi1，係一套舞曲同社交舞。喺舞步上，華爾茲會涉及一對男女一路互相懷抱一路跳，而且兩個人喺跳嘅途中仲會一路係噉旋轉。華爾茲發源自中世紀打後嘅奧地利同南德國一帶，後嚟曾經喺 19 世紀期間响歐洲嘅舞會嗰度盛極一時；就算到咗廿世紀同打後，華爾茲都仲係相當有影響力，係世上最廣泛流傳嘅曲種同舞種之一。

呢個 19 世紀尾嘅雕像描繪一對跳緊華爾茲嘅男女。

《藍色多瑙河》嘅其中一段

華爾茲音樂泛指專門作嚟俾人跳華爾茲嘅舞曲，有好多易認嘅特徵：喺節奏上，華爾茲舞曲出嗮名輕快，會用三拍子，拍號多數係用 3/4 拍，速度上偏中等至快；啲人喺跳或者演奏華爾茲嗰陣，好興跟 1 2 3、1 2 3、1 2 3... 噉嘅規律打拍子，當中每段節拍第一吓拍子強。華爾茲史上出咗多位出名嘅作曲家，例如奧地利作曲家約翰施特勞斯二世就俾人嗌做「華爾茲之王」，而佢响 1866 年作嘅《藍色多瑙河》到咗廿一世紀初可以話係無人不曉咁滯。

因為華爾茲文化嘅龐大影響力，華爾茲仲有對第啲曲種同舞種產生影響，例如芭蕾舞就有喺佢哋啲舞曲嗰度採用華爾茲式嘅節奏，而且就連係喺現代嘅大眾文化嗰度都睇得到華爾茲嘅影響力－自從廿世紀開始，好似係流行歌同電子遊戲音樂等嘅大眾媒體都有採用華爾茲音樂。

華爾茲嘅英文名係 Waltz，而標準德文名係 Walzer（德文讀音： [/ˈvalʦɐ/]）。呢隻德文字詞大致似粵語 waau1 saa4 噉嘅音，原本係轉動噉解。

音樂特性

華爾茲音樂，又叫圓舞曲，有以下呢啲特徵：

• 拍號：三拍子，多數係 3/4，亦都有 3/8 同 6/8 呀噉，每段節拍第一吓拍子強，而另外嗰兩吓拍子弱。下圖係華爾茲嘅一種常見節奏：

• 速度：可以視乎地區風格而有所不同；例如英格蘭華爾茲（國際跳舞比賽上最常用嗰種華爾茲）嘅速度正路係喺 84 bpm 至 90 bpm 之間（每分鐘 28 至 30 段小節；算係一般至微快），而相比之下，維也納華爾茲就會快好多，速度閒閒哋成 159 bpm 至 174 bpm（每分鐘 53 至 58 段小節；算係快得好交關）咁高。
• Oom cha cha：華爾茲成日都會用類似下圖噉嘅伴奏；呢種伴奏就係所謂嘅 oom cha cha 伴奏－首伴奏啲音符成 1 2 3，1 2 3，1 2 3... 噉嘅規律，當中每段節拍第一吓拍子強，就似十足華爾茲應有嘅節奏噉，所以一般認為，Oom cha cha 攞嚟做一首華爾茲樂曲嘅伴奏可以起到「幫演奏嗰個人一路留意住啲拍子」嘅作用。

Oom cha cha 嘅例子

• 長嘅和弦：啲和弦好興超過一條小節咁長。
• 長嘅開頭：好多時開頭嗰度會有一段仔，係速度慢嘅。
• 二段體：早期嘅華爾茲興用二段體，即係首樂曲分兩大段，而且通常兩段都會重複，即係 A-A-B-B（A 同 B 分別代表咗嗰兩大段）噉嘅樣。
• 有一段終曲：最尾嗰段終曲，會有由打前嗰幾段旋律抽一啲部份出嚟再出現多一次（睇埋樂想嘅概念）。
• 飄浮感：有好多學者同評論家都指出，華爾茲音樂往往都會令聽嘅人有種「飄浮」嘅感覺。
  • 喺好多跳嚟做表演嘅舞種－例如芭蕾舞－當中，啲人成日都將華爾茲音樂同做跳躍做到好似飄緊噉嘅舞蹈員聯想埋一齊（睇埋 ballon）；
  • 華爾茲音樂喺現代嘅大眾文化當中都有俾人攞嚟展示同飄浮類似嘅感覺：攞電子遊戲音樂做例子，早喺 1985 年出嘅電子遊戲《孖寶兄弟》當中經已有用到華爾茲式嘅音樂，當時《孖寶兄弟》呢隻遊戲用華爾茲嚟做佈滿咗水嘅關卡－主角瑪利奧多數時間都會喺啲水入面浮吓浮吓－嘅背景音樂，而「用華爾茲式嘅音樂嚟代表飄浮（多水或者喺空中嘅關卡）」呢家嘢打後仲常見到俾人提咗做一種電子遊戲上嘅橋段，喺《最終幻想系列》同埋《薩爾達傳說系列》等嘅遊戲當中都可以見得到。

... 等等。

下圖係《藍色多瑙河》嘅樂譜其中一段，可以清楚噉見到 3/4 嘅拍號（左上角）同埋 oom cha cha 嘅伴奏（下五線譜），而上五線譜係首曲嘅主旋律：

《藍色多瑙河》嘅其中一段

舞步特性

一對男女喺度學跳華爾茲。

喺最基本上，華爾茲做嘅嘢如下：華爾茲本質上係一種拍檔舞，要兩個人－一般會係一男一女－互相懷抱住噉一齊跳；兩個人會跟住三拍子嘅華爾茲音樂，一路按住首樂曲嘅速度旋轉一路移動。喺奧地利嘅舞會裏面成日都會見到華爾茲，當中以首都維也納嘅最出名：喺呢啲舞會入面，唔跳嘅人一般都會齊齊退後去間舞廳嘅邊緣，等舞廳中間嗰度空出一個有返咁上下大嘅空間；想跳華爾茲嘅男士跟住就要行埋去佢哋想邀請嘅女士嗰度，問嗰位女士有冇興趣一齊跳（即係所謂嘅 May I?），而如果位女士肯同佢跳，兩個人就會行去舞廳中間嗰度跳；於是一對對跳華爾茲嘅男女就會喺舞廳中間一齊起舞旋轉。

盒舞步

華爾茲嘅舞步根基係所謂嘅盒舞步。盒舞步係包括華爾茲在內嘅多種社交舞嘅基本步，涉及跳舞嘅人嘅腳板嘅幾種移動方式（下圖；L 表示左腳，R 表示右腳），而因為呢啲移動方式涉及兩個人四隻腳板喺一個大致上成正方形（似一個盒）嘅空間入面移動，所以就叫做盒舞步。盒舞步嘅一種形式涉及以下六個步驟，初始位置係雙方面對面而且雙腳腳板合埋，跟 1 2 3 1 2 3 噉嘅拍子嚟跳，下圖當中黑色腳板係帶領方（傳統上係男士），而紅色腳板係跟隨方（傳統上係女士）：

• 1：帶領方右腳向前移，同時跟隨方左腳向後移；（1 至 3 對帶領方嚟講係向前-向側-合返埋一齊）
• 2：帶領方左腳向左前移，同時跟隨方右腳向右後移；
• 3：帶領方右腳向左移，同時跟隨方左腳向右移，令雙方都返去雙腳合埋嘅狀態；
• 4：帶領方左腳向後移，同時跟隨方右腳向前移；（4 至 6 對帶領方嚟講係向後-向側-合返埋一齊）
• 5：帶領方右腳向右後移，同時跟隨方左腳向左前移；
• 6：帶領方左腳向右移，同時跟隨方右腳向左移，令雙方都返去雙腳合埋嘅狀態；
• 喺上述過程途中，帶領方對手要一路拖住跟隨方嘅，但唔可以拉或者推對方。除此之外，兩個人嘅上半身通常都會或多或少噉有啲上下郁動，例如係隻腳𨈇出去嗰陣佢哋上半身會係噉咦下沉，而呢種上下郁動可以視乎華爾茲種類而有異－例如係維也納華爾茲噉，維也納華爾茲速度快得滯，所以跳嘅人𨈇出去嗰時通常唔會𨈇好大步，亦都因而上半身唔會有好明顯嘅上下郁動。

喺華爾茲當中，每吓踏步對應一吓拍子，所以 1 至 6 重複一次係兩段節拍。除此之外，華爾茲嘅盒舞步會涉及跳舞嗰兩個人一路慢慢噉旋轉－即係喺一吓踏步嗰時用唔係郁緊嗰隻腳嘅腳踭係噉咦轉－一路做以上嘅步驟，令兩個人能夠係音樂嘅拍子之下一路轉一路喺舞廳當中打圈。

歷史

19 世紀一幅用嚟教人跳華爾茲嘅動畫

華爾茲嘅確切起源查實有少少爭詏。要一路去到 1750 年，先至有人真係用德文字 Walzer 嚟指一種舞，不過有證據顯示，華爾茲最早有得追溯到去成 16 世紀咁久遠：喺 16 世紀嘅歐洲經已有文獻形容啲人喺度跳男女相擁噉嚟跳嘅舞，佢哋有啲人嗌呢種舞做旋轉者（個名意思上同華爾茲個德文名好似），而且亦有學者指蘭德勒呢種同時代嘅德國民俗舞同華爾茲有唔少相似之處，例如兩者都係跟 3/4 拍號跳呀噉。無論如何，學者一般都認同華爾茲係發源自中世紀打後嗰兩三個世紀之內嘅奧地利同埋南德國嘅，最遲喺 18 世紀中至後期成形。

喺初頭嗰陣，華爾茲受到唔少貴族批評，例如當時有啲人認為華爾茲涉及一男一女互相掂住對方噉嚟跳，覺得呢種舞有損體統。不過 18 世紀又係浪漫主義盛行嘅時代，有唔少後生仔女開始對打前嘅藝術觀念作出反叛，亦都對華爾茲產生好奇。到咗 1770 年代至 1780 年代，華爾茲經已開始喺維也納嘅後生男女之間廣泛流傳，成為咗當時維也納嘅一種時尚。同時由於維也納係歐洲嘅古典樂同歌劇文化中心，有唔少作曲家因而接觸到華爾茲，而當佢哋離開維也納返鄉下嗰陣，就將華爾茲嘅音樂同舞蹈文化帶到去歐洲各地。

華爾茲係喺 19 世紀初傳入英國嘅。歷史文獻指，華爾茲第一次喺英格蘭引人注意係喺 1810 年代上半橛，當時有書信記錄噉講：

「

原版英文："No event ever produced so great a sensation in English society as the introduction of the waltz in 1813." 粵文翻譯：英格蘭社會從來未試過有事件引起好似『華爾茲喺 1813 年引入』咁大嘅轟動。

」

而最遲去到 1816 年，英格蘭經已有人喺度寫同出版刊物嚟談論華爾茲音樂同埋教人跳華爾茲。及後華爾茲成為咗 19 世紀喺歐洲舞會當中最廣受歡迎嘅舞種之一，對第啲曲種同舞種影響深遠，例如爵士樂同芭蕾舞都有採用華爾茲式嘅節奏。就算到咗廿一世紀初，華爾茲都仲係好受歡迎，成日俾人攞嚟喺社交場合當中一男一女一齊共舞。

名家

出名作華爾茲樂曲嘅作曲家有以下呢啲：

• 約翰施特勞斯一世（1804 - 1849 年，奧地利）
• 蕭邦（1810 - 1849 年，波蘭），作咗多首鋼琴華爾茲，例如係下面提到嘅《降 D 大調「狗仔」華爾茲》噉。
• 約翰施特勞斯二世（1825 - 1899 年，奧地利），佢係約翰施特勞斯一世個仔，成世人作咗超過 500 首舞曲咁多，當中包括咗多首華爾茲，勁到俾人嗌做「華爾茲之王」。
• 伊米·和都菲勞（1837 - 1915 年，法國），佢又係作咗好多首華爾茲，當中《溜冰華爾茲》到咗廿一世紀都仲係好出名。
• 柴可夫斯基（1840 - 1893 年，俄羅斯），佢出嗮名鍾意幫芭蕾舞劇作曲，佢嗰三大芭蕾舞劇作品－《天鵝湖》、《睡公主》同《合桃鉗》都有出名嘅華爾茲樂曲。
• 法蘭斯·萊哈（1870 - 1948 年，奧匈帝國），佢出嗮名鍾意幫啲輕歌劇作曲，當中包括咗多首華爾茲樂曲。
• 蕭斯達高維契（1906 - 1975 年，俄羅斯）

... 等等。

名曲

《降 D 大調「狗仔」華爾茲》

《天鵝湖華爾茲》

《南國玫瑰華爾茲》其中一段

歷史上比較出名嘅華爾茲樂曲有以下呢啲：

• 《降 D 大調「狗仔」華爾茲》－由蕭邦喺 1847 年作；
• 《藍色多瑙河》－由約翰施特勞斯二世响 1866 年作；
• 《歌碧麗亞第一幕華爾茲》－由里奧·德利伯為 1870 年芭蕾舞劇《歌碧麗亞》作嘅；
• 《維也納氣質》－由約翰施特勞斯二世响 1873 年作；
• 《天鵝湖華爾茲》－著名 1877 年芭蕾舞劇《天鵝湖》當中嘅一首曲，由柴可夫斯基作；
• 《南國玫瑰華爾茲》－由約翰施特勞斯二世响 1880 年作；
• 《春之聲華爾茲》－由約翰施特勞斯二世响 1882 年作，可以配女高音獨唱；
• 《溜冰華爾茲》－由伊米·和都菲勞响 1882 年作；
• 《皇帝華爾茲》－由約翰施特勞斯二世响 1889 年作嘅，用嚟向法蘭茲約瑟夫一世同威廉二世呢兩位皇帝表示敬意；
• 《睡公主華爾茲》－著名 1890 年芭蕾舞劇《睡公主》當中嘅一首曲，由柴可夫斯基作；
• 《雪花華爾茲》－著名 1892 年芭蕾舞劇《合桃鉗》當中嘅一首曲，由柴可夫斯基作；
• 《花之華爾茲》－《合桃鉗》裏面嘅另一首曲，都係由柴可夫斯基作嘅；
• 《金銀華爾茲》－由法蘭斯·萊哈喺 1902 年作；
• 《第一號爵士樂團組曲》－當中有一部份係 G 小調華爾茲樂曲，係由蕭斯達高維契喺 1934 年作嘅；
• 《第二號爵士樂團組曲》－由蕭斯達高維契喺 1938 年作；
• 《面具舞會組曲華爾茲》－由亞南哈察都量喺 1941 年作嘅組曲《面具舞會組曲》當中嘅其中一首；

... 等等。

睇埋

• 蘭德勒：一種同華爾茲有相似之處嘅同期德國民俗舞。
• 芭蕾舞：華爾茲式節奏係芭蕾舞曲上最常用嘅節奏之一。
• 探戈：一種受過華爾茲影響嘅拍檔舞。
• 爵士樂：爵士樂當中都有用到 3/4 嘅音樂（下圖），而且佢哋興將任何 3/4 嘅音樂一律嗌做華爾茲。

• 輕歌劇
• 面具舞會

文獻

• Kemp, P. (2001). "Strauss". In Sadie, Stanley; Tyrrell, John (eds.). The New Grove Dictionary of Music and Musicians (Second ed.). London: Macmillan Publishers.
• Kennedy, M.; Bourne, J., eds. (2006). "Waltz". The Oxford Dictionary of Music (Second revised ed.). Oxford and New York: Oxford University Press. ISBN 9780198614593.
• Knowles, M. (2009). The wicked waltz and other scandalous dances: Outrage at couple dancing in the 19th and early 20th centuries. McFarland.
• McKee, E. (2012). Decorum of the minuet, delirium of the waltz: A study of dance-music relations in 3/4 time. Indiana University Press.
• Zbikowski, L. M. (2012). Music, dance, and meaning in the early nineteenth century. Journal of Musicological Research, 31(2-3), 147-165.

拎

• 華爾茲基本舞步 （英文）
• 1816 年一本華爾茲手冊 （英文）
• Music regarding: Waltz within traditional dances of the County of Nice (France) （英文）
• Scroll to "Five Step Waltz" for notes about probable 1847 origin and associated music published the same year （英文）