艷芳照相館

艷芳照相館（粵拼：jim6 fong1 ziu3 soeng2 gun2，口語叫艷芳相舖，或者就噉艷芳）係廣州市一間有百年歷史嘅相舖，搬過幾次，而今喺朝天路51號。

而家嘅艷芳相舖，喺2014年7月23號影。

歷史

間相舖係1912年兩個三水人黃躍雲、劉昌泉夾份開。最初開喺新民路口一帶（今省財政廳附近），當時廣州數埋都無幾間相舖，由於師傅技術好，好多名人慕名而來，於是艷芳亦留低咗好多珍貴歷史相，當時艷芳嘅名聲亦遠播到香港。《廣州民國日報》1926年2月曾經連續五日刊文贊艷芳相舖。建國之後，廣州有好多間出名嘅相舖，艷芳亦係其中之一，影集體相出名。艷芳1979年引入彩色影相技術，係全國第一間，一開始衹對來自港澳同外國嘅旅客開放，本地人無得用，但係艷芳都經已忙到踢嗮腳。1994年廣州整地鐵1號綫，艷芳搬到光塔路。爾段時間艷芳面對數碼技術衝擊，生意差咗好多。2000年，艷芳轉制並搬到朝天路。而今艷芳做埋數碼攝影，包括影證件相。

名人名相

• 孫中山、宋慶齡夫婦同官兵喺艦上合影；
• 廖仲愷
• 魯迅、許廣平同蔣徑三嘅合影；
• 廣州起義期間嘅《廣州蘇維埃政府成立》相
• 李濟深（經常去艷芳影相，重送過幅字「其如視諸斯乎」）；
• 毛澤東、陶鑄、葉劍英、羅瑞卿、鄧小平（爾五個人都喺艷芳影過集體相）、許世友（集體相同個人相）

參考

• 〈廣州艷芳照相館-盤古老字號服務 老廣州的眼睛——艷芳照相館〉。喺2014-11-17搵到。（簡體中文）
• 〈影像廣州——歷史定格光影長存〉。《廣州日報》。2008-4-13。頁 B1, B2。喺2014-11-17搵到。 {{cite news}}: Check date values in: |date= (help)（簡體中文）