芭蕾舞軟鞋

芭蕾舞軟鞋（粵拼：bāa le̖oi mo̗u jyu̗n ha̖ai；英文：ballet shoes / ballet slippers / soft shoes）係一種輕身而且柔軟嘅鞋，鞋底會有一定彈性，專門設計嚟俾人喺跳芭蕾舞嗰陣著住嘅。一般嚟講，跳芭蕾舞嘅人喺芭蕾舞堂嘅時候基本上實會著住芭蕾舞軟鞋，而女舞蹈員喺要上舞台表演嗰時好多時會改著足尖鞋（pointe shoes）。

一對用皮革造嘅芭蕾舞軟鞋；個舞蹈員喺度做緊第五腳位。

一般認為，揀芭蕾舞鞋要跟以下嘅原則：對鞋要有返咁上下緊，如果唔係好容易會喺跳舞嗰陣搞到自己撠親；喺款式同色水上，女舞蹈員通常會著粉色嘅軟鞋，男舞蹈員就通常會著白色或者黑色嘅，而啲芭蕾舞蹈員揀緊身褲嗰時興揀一啲同自己對鞋一樣色水嘅，等自己可以做到望落好似冇著鞋跳舞噉嘅視覺效果，順帶一提，廿世紀中興起嘅現代芭蕾舞（modern ballet）好多時唔著緊身褲跳，所以令到多咗人用肉色嘅芭蕾舞軟鞋。

構造

芭蕾舞鞋鞋底多數用皮革造，但浸皮革通常唔會一路延伸到去隻鞋嘅邊邊。鞋底可以係一嚿過嘅，但又有所謂嘅分開鞋底（split sole），即係鞋底分兩嚿，一嚿喺腳踭下面，一嚿喺腳掌前下面，等對鞋大啲彈性。芭蕾舞軟鞋鞋底以外嘅部份材質由軟皮革、帆布以至綢緞都有。帆布平啲，但比較易爛。

芭蕾舞鞋多數會有條帶喺腳掌上方，等對鞋唔會甩出嚟。好多芭蕾舞鞋會用兩條噉嘅帶，而跳芭蕾舞嘅人會將兩條帶以 X 字噉嘅形式打交叉。

睇埋

• 芭蕾舞
• 足尖鞋

拎

• Bloch.com. 舞蹈用品公司 Bloch 嘅官網。