約翰福音

《約翰福音》（希臘文：Κατὰ Ἰωάννην；天主教譯做《若望福音》），係《新約聖經》正典嘅第四卷福音，共21章，係四福音書最遲寫成嘅。呢卷書記載嘅耶穌言行有好多都冇記錄喺其他三卷福音書，特別強調耶穌嘅神性同基督徒屬靈生命嘅建造。

基督教會傳統都認為佢嘅作者係使徒約翰。

簡介

作者︰約翰
日期︰85-90年
地點︰以弗所
對象︰猶太人、受猶太人迫害嘅基督徒、外邦人（延伸對象係全地嘅人）

約翰福音主要內容描繪耶穌係上帝永恆之道，佢「成為人，住喺我哋中。」作者嘅目的係要讀呢卷書嘅人信耶穌係基督，係上帝之子，又因為噉樣信而獲得永生。呢卷書第一章指出上帝永恆之道成為人，係全書嘅導論。第二至十二章記述耶穌所行嘅好多神蹟異能，證明佢係救主，係上帝之子。根據呢十二章嘅記載，我哋知道有好多人信佢，接受佢做救主，不過亦有啲人反對佢，唔信佢。第十三章至十七章詳細記載耶穌同門徒嘅親密關係，同佢喺受難前夕教導佢哋，鼓勵佢哋嘅話。第十八章至二十一章記載耶穌被捕、受審、被釘死、復活，同復活之後向門徒顯現。

呢卷書嘅作者特別強調耶穌係引到真理同生命嘅道路，凡相信又接受佢嘅人都會得永生。約翰福音嘅顯著特徵係可以用日常生活上普通嘅事物，例如水、餅、光、牧者同羊群、葡萄樹同佢嘅果等，來象徵靈性上嘅意義。

提要

1. 導言（1章1-18節）
2. 施洗約翰同耶穌最初嘅幾個門徒（1章19-51節）
3. 耶穌嘅工作（2章1節-12章50節）
4. 最後一個禮拜喺耶路撒冷同附近地方（13章1節-19章42節）
5. 耶穌復活同顯現（20章1-31節）
6. 結尾：加利利嘅另一次顯現（21章1-25節）