莊·繆亞

莊·繆亞（粵拼：zong1 miu6 aa3）（繆讀妙；英文：John Muir，音標：[d͡ʒɔːn mjʊəɾ]；1838年4月21號—1914年12月24號）係蘇格蘭出世嘅美國作家、博物學家，係美國早期環保運動領袖。佢有好多信、文章、書係寫佢嘅自然探險，特別係其中尼華打山嘅部分廣為流傳。佢發起環保運動，喺佢努力之下，諸如優勝美地谷、美洲杉國家公園呢啲自然保護區都陸續成立。佢創辦嘅山脈社係美國有名嘅環保組織。因爲佢嘅貢獻，尼華打山有條登山道起名爲莊繆亞登山道。

1912年時嘅莊·繆亞

佢後生時喺黃石度受嗰啲湖光山色感動，喺佢嘅下半世，就致力保護美國西部嘅森林。佢向美國國會提出設立國家公園法，呢部法律後來喺1890年通過，隨即優勝美地、美洲杉設立國家公園。佢嘅作品、思想好大程度上影響咗現代環保運動，譽爲「國家公園之父」。