華懋集團
華懋集團係香港一間公司，而家主要業務係地產投資、發展及建築，而家個總部響新界荃灣如心廣場。集團前主席係亞洲女首富龔如心，佢喺2007年死咗之後，依家就由張利民擔任執行董事兼行政總裁。
華懋集團已故聯合創辦人兼持有者龔如心女士喺遺囑明示，其持有嘅集團股份會悉數用作慈善用途。
華懋集團現時由專業管理團隊營運，並由法庭委任嘅遺產管理人監督。2024年5月，香港高等法院裁定，日後成立慈善信託以監管華懋集團的營運和管理；待此方案嘅細節敲定後，信託管理人將取代現時嘅遺產管理人，監督華懋集團的發展。[1]
目前，集團嘅所有盈利，均再投資喺集團業務上。上述方案生效後，集團將按照龔如心女士嘅遺願，將部分盈利撥到慈善信託，以落實其慈善方針和目標。盈利餘額則投放喺業務上，推動集團穩步發展，繼續造福社區。
集團現時由董事局監督，成員包括執行董事張利民、王弘瀚、曾殿科；非執行董事黃德偉、莊日杰、Ted Osborn；獨立非執行董事 Peter Brien。委員會包括審計及風險委員會、策略投資委員會及薪酬委員會。
歷史
編輯華懋最初由王德輝嘅老豆王廷歆喺1940年代成立，當時嘅業務係做化工原料。之後由於中國政局動盪，華懋就將生意由上海搬去香港繼續經營。
到1960年代，王德輝同王廷歆成立華懋置業公司，之後就慢慢將重心轉為發展地產事業。早期佢哋嘅發展項目集中喺荃灣、葵涌、觀塘、慈雲山呢啲當時係城市邊緣嘅地方，同時又喺太子度起咗唔少高尚住宅。之後，華懋一路喺元朗、沙田、屯門呢啲新市鎮起咗好多樓。
1988年，王德輝同龔如心想將華懋集團上市，但係之後覺得估值唔理想，結果打消咗上市嘅念頭，成為香港少數從來都未上過市嘅地產公司。
1990年，王德輝第二次畀人綁架失蹤，集團嘅事務交晒畀龔如心打理。
到1997年，王廷歆入稟高院，要求由佢宣誓佢個仔王德輝已經死咗，到1999年，法庭正式宣佈王德輝喺法律上已經死亡。之後王廷歆就開始為咗王德輝嘅身家同龔如心打官司，法庭一路都係判王廷歆一方勝訴，龔如心更加因為涉嫌偽造文件畀人拉咗，但係到2005年9月，終審法院推翻之前原審庭同上訴庭嘅判決，宣佈龔如心揸住1990年遺囑係真嘅，龔如心因而攞到王德輝所有遺產。
2007年4月3號，龔如心因為心肌梗塞、冠心病發同子宮癌擴散轉移喺養和醫院病死，龔如心落袋唔夠兩年嘅身家，又再掀起一次爭產風暴。喺佢死後唔夠一個月，華懋慈善基金同當時冇乜人識，自稱係風水師嘅陳振聰各自揸住一份由龔如心身前立嘅遺囑，最後到2011年，高等法院裁定華懋慈善基金嘅2002年遺囑係真嘅，龔如心嘅身家，就由華懋慈善基金託管。
喺龔如心爭產官司完咗之後，律政司認為華懋慈善基金只係遺產嘅「受託人」，而華懋慈善基金就認為基金係遺產嘅「受益人」，於是要求高等法院解釋遺囑，2013年2月，高院裁定基金會敗訴，之後基金會兩次上訴都畀法庭駁回。
2019年8月，龔仁心、劉元春、龔中心同龔因心畀華懋集團炒魷魚，之後華懋集團嘅話事權就落入2018年先由南豐跳槽過嚟嘅蔡宏興手上[2]。
2024年8月31日，集團執行董行兼行政總裁蔡宏興正式退任，並由張利民接任。張利民自2022年12月起出任華懋集團獨立非執行董事，並由2024年9月起接任行政總裁；佢同時亦擔任集團策略投資委員會主席。
主要發展項目
編輯香港島
編輯九龍
編輯新界
編輯參考
編輯- ↑ 〈華懋集團 - 企業管治〉。www.chinachemgroup.com (香港中文)。喺2024-09-02搵到。
- ↑ 〈蔡宏興：華懋不要家族式經營〉。《信報財經月刊》。2022-11-14。喺2022-11-14搵到。
睇埋
編輯