華航四年大限

華航四年大限（或者叫華航四年魔咒）係2002年中華航空611號班機空難後開始流傳嘅一個都市傳說，內容係推測每隔4年中華航空嘅客機就可能發生全機幾百人喪生嘅重大空難。

由於響2002年嘅空難之前，華航響1994年同1998年亦發生過200人以上喪生嘅空難，由於3次都咁啱相隔4年，因此民間同埋航空業界就傳出「四年大限」嘅謠言，並有人預言2006年係下一個大限年。然而事實上2006年華航並未發生空難，呢個傳說亦不攻自破。但2007年華航響那霸機場停機坪又發生飛機漏油爆炸嘅事故（參閱中華航空120號班機事故），雖然無人死或者受重傷，但就再次喚起啲人對呢個傳說嘅記憶。

背景

雖然華航四年大限嘅謠言只係根據過去3次記錄做簡單嘅等差級數計算，並唔科學，但因為華航飛行安全紀錄響全世界航空公司之中排第尾，由1969年到2007年間共發生13鑊重大事故，所以仍然令好多人抱住寧可信其有嘅謹慎態度，亦構成謠言得以響台灣甚至香港同華南地區廣泛流傳嘅背景，反映出社會對華航飛行安全品質嘅唔信任。

事實上華航響嗰3次空難之間重有一次發生響1999年香港赤鱲角機場嘅嚴重意外（參閱中華航空642號班機），飛機降落失敗，上下翻轉引發大火，不過響地面人員搶救下傷亡得到控制，得3人死，50人重傷，因此冇被列入四年大限所指嘅空難之內。

四年大限所指嘅空難

日期	班號	機型	發生地點	事故簡述	死傷
1994年4月26日	140號	空中巴士A300-600R	日本名古屋機場	降落失敗重飛嗰陣墜毀，俗稱名古屋空難	264人罹難
1998年2月16日	676號	空中巴士A300B4-622R	台灣中正機場	降落失敗重飛嗰陣墜毀響機場邊緣並衝入機場旁邊嘅住宅區，俗稱大園空難	機上196人、地面6人罹難
2002年5月25日	611號	波音747-200	台灣澎湖外海	因金屬疲勞造成飛機空中解體，俗稱525華航空難	225人罹難

出面網頁

• 華航四年大限響Google上嘅搜尋結果