開主選單

葉姵延英文YIP Pui Yin1987年8月6號—)係香港女子羽毛球員。因為細個嗰陣成日參加戶外活動,曬到皮膚黑麻麻,教練就幫佢改咗「黑妹」呢個花名[1]

羽毛球生涯

早期

葉姵延6歲開始打羽毛球[2]。小學喺沙田循道衛理小學上午校(即係而家嘅馬鞍山循道衛理小學)讀書,已經開始代表學校比賽[3]。之後佢升讀賽馬會體藝中學,重同時喺香港體育學院接受專業嘅羽毛球訓練。

2003年,葉姵延決定喺中四之後暫停學業,做全職嘅運動員,之後重入埋香港代表隊[4]

2005年2月,葉姵延代表香港參加第18屆荷蘭青少年羽毛球錦標賽,贏咗女子單打同混合雙打銅牌;之後又喺亞洲青年羽毛球錦標賽,幫香港贏咗第一面女單同女雙銅牌。

呢年8月,佢響全港羽毛球錦標賽入咗女單決賽,僅僅輸咗畀「六連霸」嘅王晨,攞到亞軍,即刻被封為「王晨接班人」[5]。同一個月,佢第一次出戰大人組別嘅世界羽毛球錦標賽,即刻攞到好成績,第一輪就輕鬆淘汰西班牙選手,跟住第二輪重爆冷以2比1(8-11、13-12、11-9)反勝日本名將米倉加奈子,入咗16強[6];最後僅僅輸咗畀奧運冠軍中國嘅張寧,唔可以再進一步[2][7]

多哈亞運攞銀

一年之後,葉姵延又再打入9月舉行嘅世界羽毛球錦標賽16強,最後輸咗畀法國名將皮紅艷出局[8]

喺其後嘅多哈亞運會,葉姵延代表中國香港出戰羽毛球比賽嘅女單同女團項目。喺女單比賽入面,佢喺八強再次對住世界排名第一嘅張寧,直落兩局(21-19、21-19)爆冷淘汰對手[9][10];之後,她又喺準決賽打低咗南韓選手黃慧淵,最後殺入決賽,輸咗畀港隊師姐王晨,攞到銀牌,創咗自己運動生涯嘅最好成績[11]

2007年8月,葉姵延第三次出戰世界羽毛球錦標賽,又再打入16強;最後喺力戰之下以1比2(9-21、21-16、14-21)輸咗畀嗰屆冠軍朱琳出局[12]

京奧失準

2008年,葉姵延喺年初舉行嘅全英羽毛球公開賽,第一輪就以2比0(22-20、21-19)打低衛冕嘅謝杏芳[13],大陸傳媒重話佢係國家隊喺京奧嘅大威脅[14]

呢年8月,葉姵延代表中國香港出戰北京舉行嘅2008年夏季奧林匹克運動會羽毛球比賽,第一輪比賽就以0比2(15-21、17-21)輸咗畀33歲嘅英國老將特蕾西·哈勒姆出局[15]。賽後,港隊教練陳智才話,失準係因為呢段時間佢嘅腸胃一直唔係咁妥,日日肚屙搞到身體虛弱,影響咗佢力量型嘅打法[16]

東亞運奪金

北京奧運會後,葉姵延用咗成年時間調理身子,狀態先至慢慢回復[17]

2009年12月,佢代表中國香港主場出戰東亞運動會。佢喺女單決賽以2比1(15-21、21-13、17-10)領先隊友周蜜,之後周蜜因為腰傷棄權,葉姵延提早攞到金牌,第一次企喺大型賽事頒獎台嘅頂級[18]

廣州亞運領軍

隨住王晨退役轉做女隊教練、周蜜又因為「禁藥風波」畀世界羽聯罰停賽,葉姵延做咗港隊嘅新一代領軍人物[19]

2010年12月,佢再次代表中國香港參加廣州舉行嘅亞運會。佢喺女單一路殺入準決賽,但唔夠最終嘅金牌得主、中國代表王適嫻打,只係攞到一面銅牌,但已完成賽前教練定落嘅三甲目標[20]

廣州亞運後,葉姵延一直受傷患困擾影響表現;喺2011年世界羽毛球錦標賽嗰陣,重響16強比賽時整傷右腳舊患宣佈退出[21][22]。到11月頭,佢傷好復操,但係又因為太心急增加訓練量,喺訓練時拉傷咗大腿[23]

參考

  1. "運動員資料 Particulars of Athlete - 葉姵延". 中國香港體育協會暨奧林匹克委員會. (原先內容喺2012-05-11歸檔). 喺2011-11-17搵到. 
  2. 2.0 2.1 "小將葉姵延為理想努力". 《體育在線》. 2005-08-19. (原先內容喺2009-04-04歸檔). 喺2011-11-18搵到. 
  3. "葉姵延返回小學母校分享感受". 《頭條日報》. 2009-12-16. 
  4. "王晨與接班人葉姵延情同姊妹". 《太陽報》. 2005-08-09. 
  5. "王晨挫接班人葉姵延六連霸". 《太陽報》. 2005-08-01. 
  6. "爆冷淘汰米倉加奈子 世羽球賽葉姵延今撼張寧爭 8強". 《蘋果日報》. 2005-08-19. 
  7. "葉姵延被封王晨接班人". 《文匯報》. 2005-11-04. 
  8. "世界羽毛球錦標賽 葉姵延兵不血刃晉級". 《蘋果日報》. 2006-09-20. 
  9. "叶姵延:移动速度我占优势 张宁体力受到影响". 《华奥星空》. 2006-12-08. 
  10. "黑妹拚勁創歷史 殺退一姐 與王晨入4強". 《明報》. 2006-12-08. 
  11. "香港"小"黑马直呼进决赛像发梦:淘汰张宁也宛若梦境". 《新浪体育》. 2006-12-09. 
  12. "李永波上阵指导 朱琳拿下叶姵延约战谢杏芳". 《腾讯体育》. 2007-08-16. 
  13. "谢杏芳惨遭叶姵延横扫 全英赛卫冕冠军首轮出局". 《海口晚报》. 2008-03-06. 
  14. "全英赛谢杏芳福地遭爆冷 香港叶姵延成国羽隐患". 《体育频道》. 2008-03-06. 
  15. "羽毛球女单首日比赛结束 英哈勒姆爆冷淘汰叶姵延". 《北京奥运官网》. 2008-08-09. 
  16. "羽毛球:拉肚子拖累叶姵延 女单比赛首轮出局". 《新华网》. 2008-08-09. 
  17. "黑妹搏出最後一金 周蜜因傷棄權 「師妹摘金更高興」". 《明報》. 2009-12-14. 
  18. "周蜜因傷退賽 葉姵延摘得東亞運女單金牌". 《新華網》. 2009-12-13. 
  19. "葉姵延變大師姐領軍". 《文匯報》. 2010-10-14. (原先內容喺2010-10-18歸檔). 喺2011-11-18搵到. 
  20. "香港小將拼得一枚羽毛球銅牌 葉姵延不負王晨厚望". 《新浪網》. 2010-11-19. 
  21. "葉姵延觸傷舊患退出". 《蘋果日報》. 2011-08-13. 
  22. "黑妹中西合璧治腳傷". 《文匯報》. 2011-08-31. 
  23. "葉姵延心急累事". 《大公報》. 2011-11-14. 

出面網頁