蛤蚧

蛤蚧，俗稱大壁虎、又叫仙蟾^[1]，台灣又叫大守宮，主要分佈喺亞洲北回歸線附近嘅亞熱帶地區。除咗中國之外，亦分佈喺越南、泰國同埋老撾。大壁虎棲息喺懸岩峭壁嘅窿窿隙隙，個別亦住喺樹窿入面。穴居嘅洞隙唔大，身軀僅僅可以喺窿裏面自由行動；遇敵可以整甩條尾後走佬，隨後生返，甚至喺遇敵或者捉獵物時會咬住佢唔放^[2]。洞隙形狀各異，一般洞闊15-30厘米，高3-6厘米，深度不等，有啲可以有成幾米深。喺野外經常單獨或幾條棲息一處。大壁虎鍾意乾燥，喺低窪或石山下部好難睇到蛤蚧蹤跡。大壁虎係藥用動物嘅一種，由於長期捕捉，野生資源日漸減少。