蝦餃

蝦餃係廣東點心嘅一種，以一至兩隻蝦做主餡用一層澄麵皮包住，份量通常以一啖為主。傳統嘅蝦餃係半月形，表面類似蜘蛛肚，大概有十二褶，餡料有蝦、豬肉、筍等，有啲唔理成本令人覺得抵食嘅係純蝦肉蝦餃。優質好味嘅蝦餃一定要皮薄而軟，如果蝦餃皮係半透明就更加好；蝦肉要爽口彈牙，餃裏面有少量汁液，成隻餃就要夠熱係最好嘅。

蝦餃

金魚形蝦餃

起源

蝦餃嘅起源地，有人指出係廣州漱珠崗附近五鳳鄉嘅怡珍茶樓。最早嘅蝦餃叫做「五鳳鮮蝦餃」，誕生時間喺1920年至1930年之間。