蝴蝶刀

蝴蝶刀原名 Balisong，蝴蝶刀呢個譯名係嚟自佢另一個稱呼 butterfly knife，亦有人叫佢做「甩刀」，係一種摺合式嘅刀仔，特點係刀刃可以用刀柄收埋，由於呢種獨特嘅摺合式設計，所以喺經過練習之後，可以好快咁開合，即係叫flipping，所以成為一樣好實用嘅武器。

蝴蝶刀打開同摺埋嘅樣

由於佢獨特嘅開合方式，所以又有好多人鍾意拎嚟玩花式，熟習各種flipping技巧之後，就可以用把刀玩出好多唔同嘅花式，除咗開開合合之外，又可以左手拋右手，右手拋左手，變化多端，亦令蝴蝶刀成為一種文化。

簡史

蝴蝶刀來源有好多講法，有人話佢源自菲律賓嘅Batangas，亦有人話佢源自法國。

組件

蝴蝶刀除咗自動鎖同手動鎖之外，就無乜分別。蝴蝶刀係由四塊鐵片，刀刃，螺絲同埋最重要嘅兩粒鐵粒就可以整出一把蝴蝶刀，四塊鐵片同螺絲係用嚟做手柄同埋鎖實個四塊鐵同刀刃，而兩粒鐵粒就主要係放喺刀鈍嘅末端同埋於刀刃正下方嘅位置，呢兩粒嘢嘅作用就係等把刀定喺手柄中間，從而刀刃唔會往左右下垂（有某部分蝴蝶刀設計可能唔同，但係呢個係最普遍嘅設計）。至於自動鎖同手動鎖，分別在於一條彈弓，其他都無乜分別，鎖嘅一端都會有一塊比較突出嘅嘢去鎖住安全手柄（有鎖嘅手柄係等於刀開鋒嘅位置），而自動鎖同手動鎖嘅開鎖方法係一樣，只係用少少力撳喺鎖嘅上面，個鎖就會自動落嚟，而自動鎖就會因為有條彈弓，會自己彈出嚟，同埋玩花式嗰時，都唔會咁容易自己鎖返埋一齊，手動鎖喺玩嗰時就會飛嚟飛去，所以會比較麻煩，但係鎖刀方法都係一樣，用手將個鎖撳返落去個安全手柄。