武器
武器種類繁多，各有不同。
WMD 改
大規模殺傷性武器（weapon of mass destruction，WMD）係指大規模範圍屠殺同破壞毀滅嘅區域戰略武器，有唔少軍事科幻作品都會講及人使用大規模殺傷性武器嚟導致巨大嘅破壞，表達作者對未來軍事科技能夠達到嘅破壞力嘅不安感[1][2]。
未來武器 改
未來性嘅武器（futuristic weapons）泛指科幻作品當中出現、俾人覺得係「未來」嘅武器：軍事科幻作品成日會想像未來科技所創造嘅武器，例子包括廿世紀科幻當中好出名嘅《星戰》入面嘅激光劍（lightsaber）同埋好多科幻故仔都有嘅死光槍呀噉，而比較硬嘅軍事科幻作品仲會思考大規模殺傷性武器等嘅課題同相關嘅道德爭議所引起嘅角色衝突。
末日機（doomsday device）：指想像中能夠完全噉毀滅一粒行星上嘅生命嘅終極武器；自從二戰核武俾人喺實戰當中使用之後，世界各地嘅人就開始對「新科技創造嘅武器造成不可挽回嘅破壞」作出反思，令到軟科幻同硬科幻當中都出現咗末日機嘅諗頭。例子可以睇吓《星戰》當中能夠一炮破壞成粒行星嘅巨型太空站死星（Death Star）。
