西班牙金波斯特拉火車出軌

聖地亞哥金波斯特拉火車出軌（西班牙文：Accidente ferroviario de Santiago de Compostela）係指2013年7月24號西班牙嘅火車出軌意外，一架由馬德里駛向費羅爾嘅Alvia列車喺駛到Angrois嘅A Grandeira一個彎位嘅時候出軌，出軌地點距離聖地亞哥金波斯特拉車站大約3公里。車上224人（218位乘客，6位車務人員）之中，80人死亡，144人受傷。

消防員入車廂

由 AP-9 高速公路影影現場嘅畫面

同意外型號相同嘅 RENFE 730 型火車

列車喺轉入發生意外嗰個灣嗰陣速度達191 km/h，比速度限制80 km/h超出多過一倍，車長發現超速嘅時候，啓動咗緊急剎車。呢單意外被一個鏡頭影到，顯示13卡列車全部出軌，其中4卡反轉咗。喺意外發生嘅地點，使用嘅列車自動保護系統係Anuncio de Señales y Frenado Automático（ASFA）。

事故嘅司法調查喺2018年12月結束，列車車長Francisco José Garzón同Adif交通安全總監Andrés Cortabitarte係唯一嘅被告。截至2019年7月，仲等緊省法院處理上訴，以便2020年可以審判。

呢單出軌意外係西班牙史上其中一單最嚴重嘅，淨係得1944年Torre del Bierzo發生嗰單嚴重過佢。

背景

西班牙嘅高速鐵路網絡係歐洲最大嘅，世界上就排第二，僅次於中國。呢個網絡係由公有企業Adif建造同維護，公有企業Renfe Operadora營運。

Olomed-Zamora-Galicia高速綫並唔係完全高速，入面亦都有傳統鐵路部分。由Orense到La Coruña係用1668 mm嘅伊比利亞軌距，但係Olmeda到Zamora嘅部分就係用1435 mm嘅標準軌距。2012年12月10號，加利西亞地區政府首長Alberto Núñez Feijóo同公共工程部長José Blanco López爲Orense-聖地亞哥金波特斯拉鐵路段嘅落成典禮揭幕。喺落成典禮上面，公共工程部嘅技術人員將意外路段描述爲「困難彎位」。

Talgo-Renfe 730型火車係種高性能火車，由於佢係由柴油發動機同電動機組成嘅混合動力火車，因此可以喺高速、常規線路甚至係非電氣化線路上提供服務。它有可移動嘅滾動系統，因此可以喺伊比利亞軌距同標準軌距之間轉換。呢個系列嘅火車喺2012年6月投入商業運營。

經過

2013年7月24號，一架由西班牙馬德里去聖地亞哥金波斯特拉嘅西班牙高速鐵道 AVE Talgo 250動車組列車（編號 Alvia 151），喺當地時間20:41就嚟駛入聖地亞哥德孔波斯特拉站之前，喺一個彎位出軌。車上有二百二十二人，包括二百一十八個乘客同四個火車職員，好多人困喺車廂之內。事發之後，喺當地時間21:00左右車廂重着火。

媒體報導，嗰架列車喺出事地點時速有成一百八十公里，而嗰段高速鐵路由於有彎道，速度上限係八十公里。嗰架列車嘅司機亦困喺車相，受輕傷。媒體亦報導，司機話，火車過彎嘅時速有成190公里。個彎係由 Ourense 去 聖地亞哥德孔波斯特拉，八十公里長大直路之後，嘅第一個彎位。喺2011年12月10號通車時，亦有火車過彎時震動，令到部份乘客失去平衡。件事原因係技術問題定係人為疏失，重調查緊，司機扣留問話，佢有超過三十年嘅駕駛經驗，重喺社交網站上分享超速揸火車嘅相，出事之後啲相就冇咗。

出事之後，除咗喺現場搵到嘅屍體以外，另外有七個人死喺醫院。官方統計嘅死亡人數從最初八十人修定做七十八，因為發現部份現場搵到嘅屍體屬於同一個人。部份死者需要做 DNA 鑒證身份。

類似意外

• JR福知山線火車出軌：2005年4月23號發生喺日本兵庫縣尼崎市，司機因遲到超速造成火車出軌，撞去路邊樓廈，一百零七人死，五百六十二人傷。
• 2008年膠濟鐵路列車相撞：2008年4月28號發生喺中國山東省淄博市膠濟鐵路王村站附近，因鐵路局間調度命令傳遞混亂造成T195次司機員使用嘅IC卡資料未更新，王村站亦未通知火車相關限速，最後過彎時超速出軌，車廂撞對向路線同5034次列車，七十二人死，四百一十六人傷。
• 西班牙出過幾單有死人嘅撞火車，包括1944年七十八死（官方數字）、1972年（八十六死）、2006年7月（四十三死）以及8月（六死）。而呢個係西班牙自1972以來再一次至少七十人死嘅鐵路意外。1944年嘅意外，西班牙國家鐵路嘅記錄七十五人死，但係當時嘅佛朗哥政府有隱瞞傷亡，應該有成五佰到八佰人死。