見到細秋

見到細秋，日本童謠。佐藤八郎作詞，中田喜直作曲。一九五五年日本放送協會搞場秋之祭典，伴久美子首依支歌。支歌好多番唱，一九六五年打後，日本音樂教科書常見。

井之頭公園，紀念碑有見到細秋譜曲，中田喜直親筆。

日文歌題寫法有幾種，按日本歌曲登記，寫ちいさい秋みつけた，又有小さい秋みつけた、ちいさい秋見つけた、小さい秋見つけた、小さい秋みいつけた等寫法。

詩

詩詞講秋，一般來講，秋無分大細。特登叫細，咁同一般人見到秋分開，純屬個人經歷。屬個人經歷之故，細秋所有現象，外人各有理解。

現今都話佐藤八郎幼年感受。佢細個燒傷，並唔能自己出房，返小學都要亞媽孭。亞媽基督徒，會跟亞媽返聖堂。

詞有三段，段段開頭，日本版耍盲雞，邊個呀，邊個呀，邊個呀，見到你喇。接住話細細秋，見到你喇。弱身唔能出外，佢無份玩，睇唔清出面事，只有憑蜘絲馬迹，眼耳鼻皮去感受，曉得佢自己個細細秋。各段就寫依啲現象。

第一段講佢所聽。出面有細蚊玩耍盲雞。日本叫矇眼捉人嗰個做鬼，其他人拍手耍鬼。拍手聲，耍盲雞喺日本為春秋時節遊戲，皆因夏冬細蚊有更好玩嘢做。同時又有笛聲，又有紅頭伯勞叫聲。

第二段講佢睇出色彩。住間房北向，唔曬日光，睇落陰暗。玻璃矇，出面睇唔到入面，入面睇唔到出面。目光空色，奶粉溶開成奶色。向北一解話依間講屋內住房，另一話醫院長期病人房。

第三段講更遠。天色曚。聖堂上風向雞，心口甩皮，如同日暮紅。

佢同父異母妹，佐藤愛子，寫咗本血脈，有佐藤八郎少年事。詩文內容可以推斷。