視覺檢索

視覺檢索（visual search）係認知科學同相關領域入面一個好緊要嘅課題，研究一個人點樣由一大柞視覺訊息入面搵出一部份對佢有用嘅訊息出嚟。舉個例說明：喺其中一個版本嘅視覺檢索實驗入面，個受試者會俾研究者安排坐喺度望住個熒幕，個熒幕喺每次試驗（trial）當中都會顯示一系列圓形同四方形，而個受試者嘅任務係喺每次試驗之後答吓喺嗰次試驗入面個熒幕度有冇出現過（例如）綠色嘅圓形。跟手個研究者就可以透過操控某一啲實驗上嘅變數嚟做唔同嘅研究，再唔係或者一路俾啲受試者做呢個作業，一路用腦電圖（EEG）等嘅方法監察住佢哋嘅腦活動，睇吓個腦邊幾忽嘅活動同視覺檢索有關。