親中派對香港2021年移民潮嘅報道同評論

喺2020年6月，北京未經諮詢或香港人同意強行訂立《港版國安法》後，觸發咗港人移民潮，有啲民主陣營國家亦給予比較寬鬆嘅門檻幫助香港人。唔同媒體對港人移民潮都有所嘅報道評論，但有部份親中派媒體就被指發放假新聞或者誤導，或者建基於虛假資訊發表評論。

新聞作假或誤導例子

• 《星島日報》喺2022年7月6號發佈一篇關於英國物價嘅報道，標題指喺英國一盒牛油要價近90港元，又 「引述」網民話喺英國攞最低工資嘅話要一個鐘先買到一磚Luprak嘅牛油。但呢個報道隨即被網民批評，指所謂喺英國要90港元一盒嘅牛油，有成1公斤。喺香港買一樣牌子同份量嘅牛油，要240港元。
• 2022年5月，英國港僑協會同劍橋大學研究員發表移英港人心理健康調查報告，指有25.8%受訪嘅移英港人有焦慮症狀，18.9%有抑鬱症狀，23.8%有創傷後遺症，不過整體受訪者中有62%相信移英後精神狀況會得到改善。英國港僑協會創辦人鄭文傑亦指，創傷後遺好大程度係因為參與喺香港嘅民主抗爭所帶來，要解決就需要還香港社會一個公道，符合公義、程序嘅社會。不過，《文匯報》同點新聞就將唔同數字夾硬加埋，忽略唔同症狀可以同時出現，講到有一半移英港人唔開心，對背後嘅分析亦避而不談，就算有大學研究員參與當中，大公報亦對報告加上「所謂」一詞，話報告被黃絲「同路人」批評放負但又無引述任何證據。

部分人士評論

梁振英

梁振英係親中派入面最經常評論移英港人嘅人。例如，佢曾經指呢啲人只係移居唔係移民，因為佢哋無交還香港身份證或特區護照，又話呢啲人會被當地排斥。佢又喺2022年7月話，如果要移英港人簽署承諾書唔可以用香港嘅醫療服務，佢哋肯定唔制。

對於交還身份證或特區護照嘅說法，鍾劍華就反駁話香港無要求佢哋一定要交，梁振英咁講係避開尷尬同掩飾失敗，又話今次移民潮之下，離開嘅人日後回流嘅可能性較低，因為佢哋都想避開洗腦教育。

葉劉淑儀

葉劉淑儀喺2022年4月發表文章，同意梁振英「移居非移民」嘅說法，又話當初BNO喺英國無居留權，只係旅遊證件，中國亦唔承認。而家英國推出BNO Visa，係違反承諾，挑釁香港人。不過，佢就話，事件涉及雙重國籍，移英嘅人好多係因為非政治因素，就算中國唔承認雙重國籍，處理問題都必須小心衡量利弊。

麥美娟

麥美娟喺2022年7月剛上任民政及青年事務局局長無耐後就發表種族血統區分言論，話有啲人同國家特登令香港年輕人同香港政府對立，聲稱佢地就算支持民主同自由都會幫佢地，仲強調香港年輕人無論移民去邊度，都係永遠中國人。