親屬選擇（粵音：can1 suk6 syun2 zaak6；英文：kin selection）係進化論上嘅一個概念，指物競天擇嘅過程當中，會保護自己親屬嘅個體會有比較高嘅進化適應性－例如如果一個基因 A 會令一隻動物本能上噉想保護自己嘅親屬（兄弟姐妹同仔女等），噉基因 A 會比較大機會會流傳到落嚟，因為帶有基因 A 嘅動物嘅兄弟姐妹同仔女好可能都會帶有基因 A，所以對於基因嚟講，致使隻生物保護自己嘅親屬會有利於個基因嘅傳播。呢種現象可以解釋（例如）點解人會比較傾向對自己親人作出利他行為。
