許曉暉

許曉暉，SBS，JP（粵拼：heoi2 hiu2 fai1，英文：Florence Hui Hiu-fai，1974年7月6號—2018年12月3號），2008年加入香港特區政府，曾任香港民政事務局副局長。許曉暉喺2002年加入渣打銀行，離開前係渣打銀行東北亞地區業務策劃及發展主管，期間曾經兼任香港銀行公會秘書、香港總商會財經事務委員、香港總商會中國委員會召集人之一、以及中央政策組非全職顧問。佢亦係自2008年推行副局長制度以嚟擔任同一職位上時間最長嘅人，歷時8年幾。2018年12月6號逝世，終年44歲。

許曉暉
出生日	1974年7月6號
死亡日	2018年12月3號  （44歲）
死因	乳癌
母校	劍橋大學 哈佛大學 香港中文大學 清華大學 天后廟道建造商會學校 張祝珊英文中學
職業	生意人
[改維基數據]

屋企

許曉暉阿爸叫許宏全，1968年喺廈門大學化學系畢業，係一名老師，亦都係文革先鋒，喺左派社團入面好有名氣。響1970至74年間喺福建寧德市工業局做中共幹部，曾經被人懷疑係中共黨員。1974年許曉暉出世之後，許宏全放棄咗做中共幹部，落嚟香港做生果檔小販。不過《壹週刊》喺2008年訪問過佢五伯許宏點，佢話當年許宏全係「共產黨派佢落嚟香港搞文革、搞政治，佢做小販純粹係為咗生存同掩飾」。

佢細佬係現任財經事務及庫務局局長許正宇。佢老公叫翟普，有兩個仔女。