諾域確夫自一致原則

諾域確夫自一致原則（英文：Novikov self-consistency principle）係一個有關時空穿梭嘅猜想，用嚟解決祖父悖論噉嘅時間悖論嘅。

概論

睇埋：時間悖論同祖父悖論

祖父悖論（Grandfather paradox）係一個好出名嘅時間悖論。最基本嗰款祖父悖論係噉嘅：想像而家有個人，叫佢做「阿明」，阿明坐住時光機返咗上一個世紀；阿明時空穿梭嗰陣唔小心，錯手殺死咗自己阿爺；噉問題就出現喇－「阿明阿爺存在並且結婚生細路」係「阿明存在」嘅必要條件，如果一個人响生到任何細路之前就死咗，噉佢嘅孫理應會冇可能再存在，但响阿明嘅情況當中，「阿明存在」係「阿明阿爺响生到任何細路之前就死咗」嘅起因，噉即係話

• 設 A 做「阿明阿爺存在並且結婚生細路」；
• 設 B 做「阿明存在」；

A 引起 B 而且係 B 嘅必要條件，但 B 嘅發生最後又搞到 A 唔再發生，噉 A 唔發生，B 就應該唔再發生得到，但 B 唔發生嘅話，A 就應該會正常噉發生... 如是者，就出現咗場矛盾。

對於祖父悖論嘅問題，有唔少思考者都嘗試諗方法解開，諾域確夫自一致原則就係噉諗嘅：根據諾域確夫自一致原則，一個時空穿梭返咗過去嘅人，唔會有能力引起任何冇實際發生過嘅嘢，而「阿明阿爺响生到任何細路之前就死咗」呢樣嘢冇發生，所以阿明坐住時光機返到過去嗰陣做啲乜，都唔會引起「阿明阿爺响生到任何細路之前就死咗」呢件事。