謝志偉 (台灣)

謝志偉（英文：Jhy-wey Shieh，1955年1月6號—），台灣外省人第二代，原籍廣東汕頭，喺基隆出世，台灣學者同政治人物。

2016年11月謝志偉喺慕尼黑

佢喺德國波鴻魯爾大學攞到德國文學博士，之後做過東吳大學德文系專任教授，專長領域係德語文學專題研究、文學與社會、母題研究、性別研究。佢曾經做過行政院新聞局局長，2005年做過台灣駐德代表、2016年8月31號上任駐德國台北代表處代表，對國內使用大使頭銜。

早年經歷

謝志偉喺基隆市出世，先後喺臺灣板橋中學同埋東吳大學德國文化學系畢業，佢喺1980年入伍當兵，服預官役，直到1982年5月退伍。同年謝志偉以第一名考到德國學術交流總署獎學金，去咗德國留學。佢曾經自述自己喺德國留學五年期間發現自己對台灣歷史、政治、社會毫無瞭解，所以想建立起自己嘅「臺灣認同與意識」，開始學台語、台灣歷史同埋文化，同埋解構佢過去對中國國民黨嘅忠誠，佢亦曾經形容喺呢個過程入面，話自己由深藍（親國民黨）走向深綠（親民進黨）。去到1987年7月，謝志偉攞到德國波鴻魯爾大學（Ruhr-Universität Bochum; RUB）德國文學博士學位。

家庭

謝志偉嘅爸爸係來自廣東汕頭移民臺灣嘅船員，識講流利嘅粵語、上海話，識少少日文同英文；媽媽係臺灣高雄人。

謝志偉已婚，太太係王齡慧，有兩個女。

部份言論

香港逃犯條例爭議期間

佢喺爭議入面支持香港人，形容示威者係捍衛緊曾擁有但被中共剝奪嘅自由，又話香港年輕嘅抗爭者係代表人類嘅尊嚴同魔鬼嘅邪惡對抗。

指控中國外交官惡霸行徑

喺2021年5月，謝志偉喺Facebook透露，佢曾經受到德國柏林一名重量級文化人士邀請出席一場藝術活動，但中國得知謝志偉要出席嘅時候，威脅主辦方要將謝原本嘅貴賓席位讓畀中國代表，甚至要求台灣代表唔可以坐得太接近佢哋。當時活動嘅主席已經提出讓步，話讓自己嘅位畀中國代表，但中國代表仍然唔肯接受，甚至威脅或如果唔就範，中國團會整團缺席。謝志偉之後又話，中共政權為咗打擊台灣，乜嘢「死人骨頭阿代誌」都做得得出，連國際海洋法庭嘅判決都會同你講只係一張紙，更何況係武漢肺炎疫苗或者商業合約。