警察會球場，俗名花墟球場，係香港警務處轄下嘅警察體育遊樂會管嘅球場，喺香港九龍石硤尾西洋菜北街430號，近旺角花墟，1938年啟用。
警察會球場本來有個容納到八千個位嘅看台，曾經係其中一個香港甲組足球聯賽主要比賽場地。1979年警察體育遊樂會唔再將球場借畀香港足球總會，就將看台拆咗，之後球場只係畀警察足球隊做香港乙組足球聯賽或者香港丙組足球聯賽主場。
1998年，警察足球隊退出聯賽，警察會球場就無再舉行過香港足球總會賽事。
