警覺

警覺（粵拼：ging2 gok3；英文：alertness）係心理狀態嘅一種。一個處於警覺狀態嘅人（或者第啲動物）能夠一定程度上噉留意到周圍嘅環境（而唔係集中精神做緊一樣嘢），而且能夠喺周圍環境有危險出現嗰陣應對（所以可以用「對周圍環境刺激反應有幾快」嚟量度）。警覺性對一個健康正常人類嘅生存嚟講好緊要，而警覺性可以受好多因素影響，例如攰、抑鬱、瞓得唔夠、或者專注力失調或過度活躍症等都可以搞到一個人警覺性不足，警覺性不足嚴重起上嚟仲可以搞到個人意識上出現異常。

警覺性喺心理學同神經科學等領域上係一個重要課題，因為有好多責任重大嘅工作，例如係飛機師或者核能發電廠嘅監控人員等，都要喺做嘢嗰時維持高度警覺，而如果佢哋因為警覺性不足而犯錯，後果可以好大陣仗，而事實係研究發現，對於一啲做重複性工作嘅人員嚟講，保持專注可以係好困難嘅。

生理

警覺性同額葉（frontal lobe）以及頂葉（parietal lobe）呢兩個腦區好有關係。

受藥影響

有好多藥都可以影響一個人嘅警覺性：

• 某啲類型嘅安非他命（amphetamine）可以幫人保持警覺性同埋專注，就喺二戰嗰陣有俾美軍攞嚟幫佢啲（工作量好大，好多時唔夠瞓嘅）士兵同飛機師保持清醒，而喺二戰當中英國軍隊據報就用咗成 7,200 萬粒安非他命藥丸咁多，有人仲話安非他命係英國打贏仗嘅主因。亦都有唔少大學生同高中生會用安非他命嚟幫手集中精神温書。
• 有人會用可卡因（cocaine）嚟提高警覺性。

睇埋

• 注意力
• 專注
• 關聯負變化