財經演員

財經演員，簡稱「財演」，係香港股市對成日喺電視台、電台、報紙或者雜誌出鏡嘅財經分析員或者股評人嘅貶稱類潮語，稱呼嚟自信報前專欄作家、精電集團行政總裁蔡東豪（筆名「原復生」）。

財經演員嘅特徵，就係財經分析員或者股評人多恃住自己嘅知名度，或者只靠個樣，用「專家」嘅身份對住人，喺未做足資料搜集就亂噏，好似演員做戲咁樣，畀散戶所謂「投資指引」，建議買或者賣某隻股票。財經演員呢個「職業」通常喺股市暢旺嗰陣出現，為咗應付大眾嘅需求，散戶都希望搵股評人打救，傳媒就請股評人分析財經資訊。不過，因為股評人質素參差，間接呃咗唔少散戶，令佢哋損失慘重。

人稱「肥仔文」嘅孫柏文就係財經演員嘅一個典型例子。