賣火柴嘅細路女

《賣火柴嘅細路女》（丹麥文：Den Lille Pige med Svovlstikkerne，大致係帶住火柴嘅細路女噉解）－又叫《賣火柴嘅姑娘仔》－係由安徒生寫嘅一個童話故事，出版於 1845 年。個故仔講一個賣火柴嘅細路女臨死前嘅經歷。

依幅圖描繪有個男人發現個細路女喺街頭凍死咗。

情節大要

以下係《賣火柴嘅細路女》嘅劇情大綱。

故仔發生喺一個凍冰冰、落大雪嘅元旦前夕夜晚。有一個好窮、連鞋都冇得著嘅細路女喺街頭賣火柴。佢打住冷震噉賣，但一枝火柴都賣唔出。佢開始驚，驚攞唔到錢返屋企會畀阿爸打。個細路女愈諗愈驚，唔想返屋企，同時街頭又凍啲路人又對佢不理不睬噉。佢感到好無助，而且佢對手凍到就快冇嗮感覺咁滯，於是佢就搵咗條巷仔坐低，將啲火柴逐枝逐枝點著，諗住噉做起碼可以取吓暖。

個細路女望實火柴嘅火，點知望吓望吓佢就開始見到各種嘅幻影：佢見到暖笠笠嘅火爐，跟住又見到望落好好味嘅燒鵝，仲有聖誕樹閃呤呤噉好靚。不過火燒燒吓就熄咗，而啲幻影就跟住消失。個細路女抬頭望上天，睇到一粒流星，醒起過咗身嘅嫲嫲話過：

「流星出現，表示有人就嚟要去天堂。」

然後個細路女點著下一枝火柴。出乎佢意料嘅係，佢竟然見到嫲嫲－嫲嫲係唯一一個會惜sek3佢嘅親人。佢好掛住嫲嫲，好想見到嫲嫲，唔想嫲嫲嘅幻影咁快消失，就一嘢將佢手上嘅火柴冚唪唥點著嗮。啲火柴燒到好光，彷彿好似夜晚突然變咗日頭噉。喺火光形成嘅幻影當中，佢見到嫲嫲上前嚟攬實佢，然後佢就跟住嫲嫲升咗上天，去到一笪冇寒冷、飢餓同恐懼嘅地方。

到咗第二朝，啲路人發現個細路女條屍－原來佢凍死咗。佢哋望到個細路女隻手揸住嗰一大扎火柴。

「冇陰功囉lo3，佢博嗮命想取暖。」

佢哋唔明，點解個細路女喺生命最後一刻面露微笑－因為佢去咗天堂同嫲嫲過新年。

版本差異

有啲版本話，火光入面嗰樣「好好食嘅嘢」係火雞唔係燒鵝。

睇埋

• 瀕死體驗
• 童話故事
• 安徒生童話
• 快樂王子

拎

• THE LITTLE MATCH GIRL （英文），《賣火柴嘅細路女》一個英文譯版。
• Literature / The Little Match Girl （英文），TV Tropes 依頁講《賣火柴嘅細路女》。