賭

賭（粵拼：dou2；英文：gambling）係種靠估嘅玩意——喺結果／真相揭曉之前，賭者要先為自己嘅估計投入有價值嘅嘢（名為賭注）；估中有賺，估錯就蝕。雖然話係玩意，但係當賭注好大，佢所帶嚟嘅影響會唔講得笑。

摩登經濟學大致將「賭」定義為：「將錢或有物質價值嘅嘢，押喺後果唔確定嘅事上面，期望贏得額外嘅錢及∕或物質利益。」^[1]本文專注講賭錢（口頭語）／賭博（書面語）／博彩（官腔語）；佢既有經濟活動元素，亦含娛樂行為成分，形式林林總總。

西方社會興嘅賭局，重點往往在於落注者估唔估得中某樣嘢，其結果有好多完全隨機（例如輪盤），亦有唔少大概全靠其他人決定（例如賽馬）。流行於東方社會嘅賭局，經常包括憑落注者自己參與決定結果嗰啲，而且競技成分頗高（例如打麻雀），甚至係純粹嘅技術比拼（例如捉棋）。^[2]

文字分析

「賭」之重點在於「財物」，多數用於貶義論述。^[3]^[4]「博」之重點在於「比拼」，多數用於褒義論述。^[5]^[6]因此，將「賭」及「博」加埋一齊，就得到一個中性兼廣義嘅書面用語嘞；而「賭錢」呢個口頭用語，就有微觀意味，稍為貶義。

官腔用語「博彩」有宏觀意味，稍為褒義，佢其實係靠借代得嚟嘅。「博」及「彩」嘅本義可以一齊追溯至古代嘅擲骰仔遊戲。^[7]^[8]^[9]「博彩」亦係個有微觀意味，解「碰運氣」嘅中性口頭用語，其來源與上者相同。^[10]^[11]

賭博除咗係種經濟行為之外，亦包含感情嘅投入。^[12]

呢篇同賭有關嘅文係楔位文。歡迎幫維基百科擴寫佢。