超強颱風

香港天文台熱帶氣旋等級
等級	風速
超強颱風	≥100節 ≥185公里每小時
強颱風	81–99節 150–184公里每小時
颱風	64–80節 118–149公里每小時
強烈熱帶風暴	48–63節 88–117公里每小時
熱帶風暴	34–47節 63–87公里每小時
熱帶低氣壓	22–33節 41–62公里每小時

超強颱風、超級颱風或者超級強烈颱風（英文：Super Typhoon，香港天文台簡寫SuperT.，中國氣象局簡寫SuperTY，美國聯合颱風警報中心簡寫STY），係西北太平洋熱帶氣旋最猛烈嘅分級。呢級唔係世界氣象組織嘅建議分級，但係唔少官方氣象部門都有設立呢級，不過下限定義就唔同，最低嘅接近中心最高持續風速係每小時160公里，最高嘅就係每小時240公里。

簡介

呢個級別喺香港天文台同中國國家氣象中心嘅分級入面都叫做「超強颱風」，定義係熱帶氣旋接近中心最高持續風速達到每小時185公里以上，唯一分別係香港天文台用10分鐘平均風速嚟計，中國國家氣象中心就用2分鐘平均風速；菲律賓大氣地球物理和天文服務管理局都叫「超強颱風」，不過定義係風暴接近中心最高持續風速達到每小時220公里以上，計10分鐘平均風速；至於大韓民國氣象廳嘅「超強颱風」定義就係每小時160公里以上；而喺聯合颱風警報中心，以及1991年之前中華民國交通部中央氣象局嘅熱帶氣旋分級入面，分別叫做「超級颱風」同「超級強烈颱風」，定義中心附近持續風力係每小時130海里以上（即係每小時240公里以上），但係用1分鐘平均風速去計。

「超強颱風」係中國國家氣象中心喺2005年11月開始用嘅分級，用嚟分別颱風級熱帶氣旋嘅最強級數。香港天文台喺2009年轉用新嘅熱帶氣旋分級制，都加入咗呢個分級。