超級馬利奧樂園3 華利奧樂園

超級馬利奧樂園3：華利奧樂園（日文：スーパーマリオランド3 ワリオランド；英文：Wario Land: Super Mario Land 3）係任天堂1994年1月21號喺Game Boy出嘅超級馬利奧樂園系列作品^[1]。

佢係第一隻由華利奧做主角嘅遊戲，亦係Captain Syrup（キャプテン・シロップ）同佢嘅馬仔Brown Sugar Pirates首次出場嘅遊戲。

雖然係叫「超級馬利奧樂園3」，但係馬利奧喺呢隻遊戲絕少出現。

簡介

華利奧樂園嘅故事係超級馬利奧樂園2：六個金幣（華利奧係呢隻遊戲嘅最後大佬）嘅延續。同之前嘅超級孖寶兄弟系列作品唔同，遊戲冇公主要救，而目的係令華利奧搵到越多嘅錢去買城堡，令馬利奧妒忌。另外華利奧亦可以儲「心」，儲到咁上下就可以獎隻。

成隻遊戲有40關（包埋隱藏嗰啲）。其中多個關有隱藏嘅寶箱，而嗰啲地方要用到鎖匙先至入到去。每個寶箱都有唔同嘅寶物，而寶物亦有唔同價值。

華利奧嘅行動方式同馬利奧有唔同，其中之一係佢就噉掂啲敵人自己都唔會有事（掂到佢哋啲武器除外），而佢踩到敵人之後，重可以將佢哋拎起當武器用。

如果佢有10個或以上嘅錢，華利奧可以攞出一個值10個錢嘅銀仔，去開終點大門、開Check point又或者當武器用。佢掟出去嘅銀仔係可以收返。

華利奧可以攞一啲帽嚟同自己升級。噴射帽令佢可以喺個天飛一段距離、走得快啲，亦可以喺水入面用衝撞；火龍帽令佢可以噴火攻擊，就算落咗水都出到；牛角帽令佢更加大力，可以衝撞多一段距離、吊喺天花板同埋出重磧。另外，華利奧亦可以攞星星令自己變成無敵一段時間。

如果華利奧中招，就會縮細、冇帽戴同埋冇得出衝撞。喺縮細咗嘅情況下再中招就會死同埋跌晒喺嗰關搵到嘅錢。

入關卡後，禁start制，連按16吓select制，會出現一個小方格，禁住B制和方向制可左右移小方格，禁住B制和上下可改數值，最多99條命，999金幣，99個心，999時間。

同時禁AB制移到華利奧頭像，再住B制和上下可進行變身。