越野單車賽

越野單車賽（英文：Cyclo-cross），有時亦被稱為 "cyclocross"、"CX"、或者"cross"，係一種單車比賽。Cyclo-cross通常喺秋冬季舉行，喺西歐國家例如比利時、荷蘭、法國，以及美國西部例如俄勒岡州相當流行。Cyclo-cross有啲部分似公路賽，有啲部分就似山地賽。Cyclo-cross嘅特色係參賽者以接近公路賽規格嘅單車進行比賽，同時需要克服唔同嘅地形，跨越障礙物。

單車選手間中需要落地抬車似乎成為咗Cyclocross嘅標誌

Cyclocross賽事進行中

簡史

Cyclo-cross 嘅起源眾說紛芸，但一般相信呢項賽事喺二十世紀初開始。當時公路單車比賽嘅賽季係夏季，部分相熟嘅選手喺賽季過後，私下約埋一齊操練，鬥快由一條村踩單車去另一條村。由於係私人搞嘅活動，規則無正式比賽咁多，於是為咗縮短距離，涉水過河、爬坡跨欄都有，唔會完全跟道路嚟行。

慢慢，呢種「私鬥」模式發展成一種獨立於公路賽嘅運動。1902年，法國人Daniel Gousseau倡議開辦第一次全國Cyclo-cross比賽。

1910年，法國單車選手Octave Lapize奪得當年環法單車賽（Tour de France）冠軍。賽後Lapize將佢嘅勝利歸功於Cyclo-cross鍛煉。此後，Cyclo-cross開始喺法國周邊嘅國家流行起嚟。

1910年，比利時舉咗首次國全國Cyclo-cross比賽。瑞士喺1912年跟隨，然後1923年嘅盧森堡、1929年嘅西班牙、同埋1930年嘅意大利都開辦咗自己嘅Cyclo-cross比賽。

1940年代，國際單車聯會（Union Cycliste Internationale，UCI）為Cyclo-cross訂立規則，UCI 喺1950年喺法國巴黎舉辦首個世界錦標賽。

Cyclo-cross喺1970年代傳到美國，首個全國性賽事喺加州柏克萊市舉行。

賽季及賽事

Cyclo-cross賽季通常係每年九月至翌年二月左右。目前 UCI 認可嘅賽事有以下各項：

• UCI 世界錦標賽
• Cyclo-cross世界盃
• Superprestige（歐洲）
• GvA Trophy（比利時）
• National Trophy Series（英國）
• US Grand Prix Cyclocross（美國）
• The Cross Crusade（美國）

裝備

單車

用於Cyclo-cross嘅單車亦稱為 "cross bike"，中文勉強可稱之為「越野公路車」。基本上接近公路單車規格，唔同嘅地方係越野公路車採用凹凸胎紋較深較闊嘅車胎取代公路車胎（增加輪胎同地面嘅抓力）、採用懸臂式制動鉗代替C形制動鉗（增加制動鉗同車轆距離，避免車胎上面積聚嘅泥土削弱制動力）、採用齒輪比例較細嘅山地車嘅齒輪代替公路車齒輪（上斜比較慳力）。由於比賽中部分路段無可避免要抬車，越野公路車嘅制動線同變速線都唔會放置喺車架上管嘅底下。

衣着

同公路賽選手嘅衣着差唔多，但由於Cyclo-cross通常係喺秋冬季舉行，因此長袖單車衫比較流行。而且由於有部份路段需要參賽者抬車奔跑，公路賽選手嘅硬式單車鞋喺Cyclo-cross比較罕見。

比賽場地

Cyclo-cross通常採用繞圈制，每一圈大約2.5至3.5公里。UCI監督下嘅比賽場地至少必需有三米闊，以鼓勵參賽選手爭取爬頭機會。場地通常包含唔同嘅地質例如草地、沙地、泥地、柏油地等等，亦包括唔同嘅地形例如平地、鈄坡、天然或者人工障礙物、甚至梯級等等。同山地車比賽場地比較起嚟，Cyclo-cross場地嘅崎嶇程度比較低一啲。

由於唔可能好似公路賽咁，有支援車跟住選手，Cyclo-cross場地通常會劃出一個區域，定為後勤支援區。當選手需要後勤人員支援嘅時候，會駛入支援區，尤如方程式賽車駛入維修站一樣。

技術

由於比賽場地可能包括一啲難以直接踩單車越過嘅地形同障礙物，點樣有效越過呢啲地形同障礙物就成為各參賽者嘅主要課題。對於地形例如太斜嘅鈄坡或者樓梯，選手要快速落車、抬車、越過、再上返車。至於障礙物，部分選手會抬車越過，亦有部分選手會嘗試連人帶車跳過。另外，各選手亦要適應唔同質地嘅路面對單車表現嘅影響。

參考

• "Cyclo-cross Organiser's Workbook". British Cycling. Retrieved September 29, 2006.

連出去

• Cyclo-cross Videos - Cyclo-cross選手第一身視點影片